जनताबाट निर्वाचित भएर आएको हुँ, कसैले माग्‍दैमा राजीनामा दिन्‍न : प्रधानमन्त्री

तस्बिर : रासस

किमाथांका : प्रधानमन्त्री केपी शर्मा ओलीले आफू जनताबाट निर्वाचित भई स्थिरताका लागि सरकार प्रमुख भएकाले कसैले राजीनामा माग्दैमा नदिने दोहोर्‍याएका छन् । पछिल्लो समय सत्तारुढ नेकपामा फुटको हल्ला चलाइए पनि त्यस्तो हल्लाको पछि उनको आग्रह थियो । प्रधानमन्त्री ओलीले सरकार परिर्वतन नहुने बताउँदै भने, 'म जनताको विश्‍‍वासले सरकारमा आएको हो । अहिले सरकार परिर्वतन हुँदैछ भन्‍ने हल्ला चलाउनु वा मेरो राजीनामा माग्‍नु व्यर्थ छ ।'

चीनसँग जोडिको किमाथांका नाकाको बुधबार अवलोकन गर्दै प्रधानमन्त्रीले उत्तर-दक्षिण कोशी राजमार्ग छिट्टै निर्माण हुने बताए । त्यही पुगेर उनले यस्तो बताएका हुन् ।  यी दुई मार्ग चाँडै एकापसमा जोडिने उनले बताएका हुन् । 
 
ओलीले उत्तर-दक्षिण कोशी राजमार्गको हेलिकप्टरबाट अनुगमन गरेका हुन् । मार्ग चीन, भारत र नेपाललाई जोड्ने देशकै महत्वपूर्ण बाटो रहेको बताउँदै ओलीले यसका लागि सरकारले प्राथमिकता दिएको बताए । संखुवासभाको किमाथांका सडक खण्डको पहरा छिचोल्न नेपाली सेनालाई जिम्मा दिइसकिएको र सडक ट्रयाक खुलेपछि भएपछि कालोपत्रसम्मको काम क्रमशः हुने उनले बताए । उत्तर-दक्षिण कोशी सडक निर्माणपछि किमाथांका निकै नजिक हुने उनको भनाइ छ ।

प्रधानमन्त्री ओलीले अरुण तेश्रोको कामबाट आफू सन्तुष्ट रहेको बताए । उनले आजै अरुण तेश्रो जलविद्युत परियोजनाको पावर हाउस निर्माण क्षेत्र पुखुवा र ड्याम निर्माण क्षेत्र फ्याक्सिन्दा दोभानको हवाइ अनुगमन गरेका थिए । अनुगमनका क्रममा अरुण तेश्रो जलविद्युत परियोजनाका कार्यकारी प्रमुख अरुण धिमानले प्रगति विवरण पेश गरेका थिए । 

धिमानले हाल दुई हजार ४ सय कामदाबाट २४ सै घण्टा काम भइरहेको जानकारी दिए । अहिलेसम्म ३ सहायक सुरुङ मार्ग सहित ड्याम साइडबाट पावरहाउससम्म पुग्‍ने सुरुङ मार्ग (डाइभर्सन टनेल) निर्माण सम्पन्‍न भईसकेको धिमानले बताए । अहिले उक्त सुरुङ मार्गलाई ‘कङ्क्रिड’ बनाउने काम भइरहेको उनको भनाइ छ । 

कूल नौ सय मेगावाट क्षमताको अरुण तेश्रो परियोजना सन २०२२ मा सम्पन्‍न हुने परियोजना विकास सम्झौता (पिडिए) मा उल्लेख गरिएको छ । एक खर्व ४४ अर्व लागत अनुमान गरिएको यस परियोजनाबाट नेपाललाई २१ दशमलव ९ प्रतिशत निःशुल्क विद्युत प्राप्त हुनेछ भने विभिन्‍न शीर्षकमा रु ३ खर्ब ४८ रुपैयाँ लाभ लिनेछ । 
 
प्रधानमन्त्री ओलीसँग भौतिक पूर्वाधार यातायातमन्त्री वसन्त नेम्वाङ, प्रदेश-१ का मुख्यमन्त्री शेरधन राई, प्रतिनिधिसभाका सदस्य राजेन्द्रप्रसाद गौतम, राष्ट्रियसभाका सांसद परशुराम मेघी गुरुङलगायत सङ्खुवासभामा स्थलगत अनुगमन पुगेका थिए ।