कुशलको 'कुशल' ब्याटिङमा नेपालको सहज जित

काठमाडौँ: कुशल भुर्तेल र आसिफ शेखले बलियो लय कायम राख्दा नेपालले त्रिकोणात्मक श्रृंखलामा सोमबार दोस्रो जित दर्ता गरेको छ । उद्घाटन खेलमा नेदरल्यान्ड्सलाई नौ विकेटले हराएको नेपालले दोस्रो खेलमा मलेसियालाई पनि नौ विकेटले नै पराजित गर्‍यो । 

शतप्रतिशत जित निकालेसँगै नेपालले श्रृंखलामा चार अंक बनाएको छ । तीन टिम सम्मिलत श्रृंखलामा नेदरल्यान्ड्स दुई अंकका साथ दोस्रो स्थानमा छ । दुबै खेलमा पराजित मलेसिया भने अंकविहीन छ ।    

नेपालले १२.१ ओभरमा एक विकेट गुमाएर ११३ रन बनायो । जसमा ओपनर कुशलको ६१ रन सम्मिलित थियो । लगातार विस्फोटक ब्याटिङ गरिरहेका कुशलले ४१ बल सामना गर्दा पाँच छक्का र तीन चौका प्रहार गरे । यसै श्रृंखलबाट नेपालको टि–ट्वान्टी टिममा डेब्यु गरेका कुशलले पहिलो खेलमा ६२ रन बनाएका थिए । 

कुशलले जस्तै डच टिमविरुद्ध अर्धशतक प्रहार गरेका आशिफले सोमबारको खेलमा ४२ रनको योगदान गरे । तेस्रो नम्बरमा ब्याटिङ गर्न आएका दिपेन्द्र छ रन बनाउँदै अविजित रहे । 

कीर्तिपुरस्थित त्रिभुवन विश्वविद्यालयमा पहिले टस जितेर बलिङ गरेको नेपालले मलेसियालाई १०९ रनमा सिमित गर्‍यो । नेपालका लागि करण केसी धारिलो बलिङ गरे । करणले १७ रनको क्षतिमा तीन विकेट लिए । त्यस्तै सन्दिप लामिछानेले दुई विकेट हात पारे भने सोमपाल कामी, दिपेन्द्र सिंह ऐरी, शाहब आलम र कुशल मल्लको नाममा एक–एक विकेट रह्यो । 

मलेसियाका लागि तीन ब्याट्सम्यानले मात्रै दोहोरो अंक छुन सके । पराजित टिमका लागि सैयद अजिजले सर्वाधिक २७ रन बनाए भने शरबिन मुनियान्डीले २० रनको योगदान गरे । त्यस्तै, शफिख शरिफले १५ रन जोडे ।