'अस्थिर राजनीतिक अवस्थाबाट निकास दिलाउन कांग्रेस नेतृत्वको सरकार आवश्यक'

फाइल तस्‍वीर

काठमाडौँ : नेपाली कांग्रेसका नेता प्रकाशमान सिंहले अहिलेको अस्थिर राजनीतिक अवस्थाबाट मुलुकलाई निकास दिलाउन कांग्रेस नेतृत्वको सरकार आवश्यक रहेको बताएका छन् । मंगलबार चितवनमा पत्रकारहरूसँग कुराकानी गर्दै नेता सिंहले वर्तमान सरकारले मुलुकलाई अस्थिरतातर्फ लागेको र नैतिकता गुमाएकाले मुलुकलाई निकास दिनुपर्ने बताए । 

‘जनताले कांग्रेसलाई प्रतिपक्षमा बस्न भनेको हो, उनले भने, 'तर देशको अवस्थालाई हेरेर, अस्थिर राजनीतिलाई स्थिर बनाउन र बाँकी समयमा विकास निमार्णका काम गरी निवार्चन गराउन कांग्रेसको नेतृत्वको सरकार आवश्यक छ ।’

उनले नेपाली कांग्रेसले पाएको जिम्मेवारी सधैँ पूरा गरेको र अहिले पनि पुरा गर्ने बताए। मुलुकलाई दुर्घटनाबाट बचाउन ओली सरकारलई हटाउन कांग्रेस आफै अग्रसर भएको उनको दाबी छ । 

‘अहिलेको सरकारले न भष्ट्राचार रोक्यो, न सुशासन कायम गर्‍यो, न विकास निमार्णका कार्य गर्‍यो, बिकास बजेटसम्म पनि खर्च गर्न सकेन’ उनले भने, ‘राजनीतिमा नैतिकताको धेरै महत्व हुन्छ । यो सरकारले नैतिकता गुमाइसकेको छ । अब यसको विकल्प तत्काल दिनुपर्छ ।’
उनले कांग्रेसको आगामी महाधीवेशन तोकिएकै समयमा सम्पन्न हुने बताए।