'आईपीएल विश्‍वकै सर्वोत्कृष्ट क्रिकेट लिग'

काठमाडौँ: चेतेश्वर पुजरा इन्डियन प्रिमियर लिग (आईपीएल) मा पुनरागमन गर्दैछन् । आईपीएलमा अन्तिम पटक सन् २०१४ मा खेलेका पुजारा त्यसपछिका संस्करणहरुमा ‘अनसोल्ड’ रहँदै आएका थिए । तर महेन्द्र सिंह धोनीको नेतृत्वमा रहेको चेन्नाई सुपर किंग्सले खरिद गरेपछि पुजार यस वर्षको आईपीएलमा सहभागी हुने भएका हुन् । 

पचास लाखमा बिक्री भएसँगै चेन्नाईबाट आईपीएल खेल्ने पक्का गरेका पुजारा दंग छन् ।  ‘आईपीएलमा पुनरागमन गर्न पाउँदा म खुसी छु । यो विश्वकै सर्वोत्कृष्ट क्रिकेट लिग हो । धेरै वर्ष म यस लिगबाट बाहिर रहे । फेरि फर्कन पाउँदा म भागइमानी महसुस गरिरहेको छु,’ क्रिकबजसँग कुरा गर्दै पुजाराले भनेका छन् ।

चेन्नाईको पुजारा खरिद गर्ने निर्णयको चौतर्फी प्रशंसा गरिएको थियो । यसअघि आईपीएल क्लबको नजरमा पर्न नसकिरहेका पुजारा इंग्लिस काउन्टी क्रिकेटमा व्यस्त रहन्थे । यसपटक आईपीएलमा खेल्ने पक्का भएसँगै पुजाराको लक्ष्य छ, टि–ट्वान्टी ढाँचाको लागि आवश्यकीय कौशल अभिवृद्‍धि गर्ने । टेस्ट क्रिकेटका लागि उपयुक्त भनिएका खेलाडीलाई टि–ट्वान्टीमा मौका नदिइने पनि पुजाराको गुनासो छ । 

पुजाराले आफू चेन्नईका कप्तान धोनी प्रति कृतज्ञ रहेको पनि बताए । ‘धोनी र चेन्नाई क्लब प्रशासनले मलाई विश्वास गरेकोमा धन्यवाद भन्न चाहन्छु । यो मलाई दिइएको सम्मान पनि हो । यसमा म एकदमै खुशी छु,’ ३० आईपीएल खेल खेल्दा तीन सय ९० रन बनाएका पुजाराको भनाइ थियो ।