सरकारको नीति आगो लागेपछि कुवा खन्ने जस्ताे छ– गोकुल बास्कोटा

काठमाडौं–नेकपा एमालेका सांसद गोकुल बास्कोटाले सरकारको नीति 'आगो लागेपछि कुवा खन्ने' जस्तो भएको बताएका छन्  । उनले संसद्मा जारी मूल्यवृद्धि सम्बन्धी जरुरी सार्वजनिक महत्वको प्रस्तावको छलफलमा बोल्दै यस्तो बताएका हुन् ।

‘कर्णालीमा तेल उत्खननको कुरा ग्याँस उत्खननको कुरा कहाँ पुग्यो ?,’ उनले सरकारलाई प्रश्न गर्दै भने, ‘ सरकारको नीति कार्यक्रमा देखिएन । आगो लागेपछि कुवा खन्ने यो सरकारको नीति हो । त्यसकारणले झन् झन् मूल्य वृद्धि संकटमा बढ्दै जान्छ ।’

सरकारले पेट्रोलिय पदार्थको संकट आउँछ भनेर पहिल्यै थाहा पाएर पनि समाधानको कुनै उपाय ननिकालेको उनको भनाइ छ ।  सरकार रमिते मात्रै भएको उनले आरोप लगाए ।

‘सरकारलाई थाहा थिएन युक्रेन र रुसको यत्रो युद्ध भएको भर्खर थाहा पायो ? सरकारले यो थाहा पाएन कि अमेरिकाले समेत ४५ अर्ब डलरको तेल रुससँगै किन्यो भन्ने थाहा पाएन ? मूल्य वृद्धि बढ्छ यसको चेन असर पर्छ भन्ने थाहा पाएन । समाधानको उपाय किन अपनाइएन ?,’ उनले प्रश्न गरे ।