काठमाडौँ महानगरले माइतीघर र बानेश्वरको भित्तामा चित्र बनाउने
काठमाडौँ- काठमाडौँ महानगरपालिकाले सार्वजनिक स्थलमा भित्ते चित्र बनाउने भएको छ । बुधबार महानगरपालिकाको सार्वजनिक निर्माण विभाग र ललितकला प्रज्ञा प्रतिष्ठान सम्झौता भएको हो ।
विभागका प्रमुख सुरज शाक्य र प्रतिष्ठानका उप-प्रशासन प्रमुख कमलमणि काफ्लेले उक्त सम्झौता पत्रमा हस्ताक्षर गरेका छन् । ५० लाख रुपैयाँ भित्ते चित्र बनाउन महानगरले ललितकला प्रतिष्ठानसँग सम्झौता गरेको हो ।
विभागका अनुसार पहिलो चरणमा माइतीघरबाट बबरमहल जाँदा दायाँतर्फको भित्ता, प्रदर्शनी मार्गका भित्ताहरू, अन्तराष्ट्रिय विमानस्थल बाहिर, बानेश्वर मीनभवनको भित्ता, लैनचौर समाजकल्याण परिषद्को भित्ताहरू चित्त लेखनका लागि स्वीकृत भएका छन् ।
सम्झौता बमोजिम स्वीकृत भएका डिजाइन र स्थानहरुमा प्रतिष्ठानले भित्ते चित्र बनाइनेछ । यो काम २०८१ जेठ मसान्तसम्ममा सम्पन्न गरिनेछ । भित्ते चित्र बनाउन प्रतिष्ठानले स्थान र क्षेत्रफलसहितको कार्ययोजना पेश गर्नेछ । स्वीकृत कार्य योजनाका आधारमा काम हुनेछ ।
चित्र बनाउन प्रतिष्ठानले व्यक्ति र संस्थाहरूसँग सम्झौता गरेर काम लगाउन सक्नेछ ।
यसरी काम लगाउँदा सम्झौता गर्ने, कार्यादेश दिने, मूल्याङ्कन गर्ने, भुक्तानी गर्ने, जवाफदेहिता वहन गर्ने दायित्व प्रतिष्ठानकै हुनेछ । यसका लागि महानगरपालिकाले ५० लाख रुपैयाँ उपलब्ध गराउनेछ । सम्झौता भएपछि ६० प्रतिशत (३० लाख रुपैयाँ) र कार्य सम्पन्न भइसकेपछि ४० प्रतिशत (२० लाख रुपैयाँ) प्रदान गरिने सम्झौतामा उल्लेख छ ।
प्रतिष्ठानले कार्ययोजना बनाउँदा सम्झौतामा उल्लेख भएको रकम बमोजिमको बनाउनु पर्नेछ ।
