काठमाडौँ- पाहुना टोली अस्ट्रेलियाले एक खेलअगावै न्यूजिल्यान्डविरुद्धको तीन खेलको टी-ट्वान्टी क्रिकेट सिरिज जितेको छ ।

शुक्रबार अकल्यान्डमा भएको दोस्रो खेल ७२ रनले जित्दै अस्ट्रेलियाले सिरिज २-० ले आफ्नो पक्षमा पारेको हो ।

शुक्रबारको खेलमा १ सय ७५ रनको लक्ष्य पछ्याएको न्यूजिल्यान्डले १७ ओभरमा सबै विकेट गुमाएर १ सय २ रनमात्र बनाउन सक्यो ।

न्यूजिल्यान्डका लागि ग्लेन फिलिप्सले सर्वाधिक ४२ रन बनाए । न्यूजिल्यान्डलाई सस्तैमा समेट्न अस्ट्रेलियाका लागि एडम जाम्पाले सर्वाधिक ४ विकेट हात पारे ।

यसअघि टस हारेर पहिले ब्याटिङ गरेको अस्ट्रेलियाले १९ ओभर ५ बलमा सबै विकेट गुमाएर १ सय ७४ रन जोड्यो । अस्ट्रेलियाका लागि ट्राभिस हेडले ४५ रन तथा प्याट कमिन्सले २८ रन जोडे ।

न्यूजिल्यान्डका लागि लोकी फर्गुसनले सर्वाधिक ४ विकेट हात पारे ।