पूर्वमन्त्री जोशीको अन्त्यष्टि

काठमाडौँ : पूर्वमन्त्री तथा नेपाली कांग्रेसका केन्द्रीय सदस्य नविन्द्रराज जोशीको पशुपति आर्यघाटमा अन्तिम संस्कार गरिएको छ । जोशीको पार्टीमा शरीरमा उनका दाजु राजुराज जोशीले दागबत्ति दिए ।
 
अन्तिम संस्कारअघि उनलाई अन्तिम श्रद्धान्जली दिन कांग्रेसका वरिष्ठ नेता रामचन्द्र पौडेल, नेताहरू प्रकाशमान सिंह, बालकृष्ण खाण, गगन थापा, शंकर भण्डारीलगायतका कांग्रेस नेताहरू पुगेका थिए । 

यसअघि जोशीको पार्थिव शरीरलाई अन्तिम श्रद्धान्जलीका लागि मध्यान्ह १२ बजेदेखि २ बजेसम्म पार्टी केन्द्रीय कार्यालय सानेपामा राखिएको थियो । 

आजै बसेको कांग्रेस केन्द्रीय कार्यसमितिको आकस्मिक बैठकले तीन दिन पार्टीको झण्डा आधा झुकाउने र एक दिन पार्टीका केन्द्रदेखि सबै तहका कार्यालय बन्द गर्ने निर्णय गरेको थियो । 

जोशीका एक धर्मपत्‍नी र एक छोरी छन् । नेपाल विद्यार्थी संघका पूर्वमहामन्त्री, संविधानसभाका दुई पटकका निर्वाचनमा सदस्य र पूर्वमन्त्री जोशी कांग्रेसका केन्द्रीय सदस्य थिए । उनी काठमाडौंमा कांग्रेसका लोकप्रिय नेताका रूपमा चिनिन्थे ।