मेयरका उम्मेदवारकी श्रीमती सुकुम्बासी बस्तीमा भेटिएपछि...

बुटवल– मौन अवधिमा निर्वाचन आयोगले आचांरसहितामा कडाई गरेको भनिरहेका बेला त्यही समयमा उम्मेदवारहरुले आर्थिक प्रलोभनको खेल तीव्र​ बनाएका छन् । त्यसको पछिल्लो उदाहरण बुटवलमा एमालेबाट मेयर उम्मेद्वार बाबुराम भट्टराईकी श्रीमती माया भट्टराई मतदाता प्रभावित गर्न सुकुम्बासी बस्तीमा पुगेको अवस्थामा पक्राउ परेकी छन् । 

बुटवल ११ मजुवामा सिर्जना भुसालको घरमा लुकिछिपी बसेको अवस्थामा उनलाइ सशस्त्र र नेपाल प्रहरीको संयुक्त टोलीले पक्राउ गरेको हो । उनी मतदातालाई पैसा बाँड्न गएको जानकारी पाएपछि स्थानीयले घर घेरा हालेको दावी गरिएको छ । 

स्थानीयको चर्को विरोध भएपछि उनलाई घरभित्रबाट निकालेको स्थानीय लक्ष्मण मल्लले बताए । प्रहरीले घरमा खानतलासी समेत गरेको छ । ईलाका प्रहरी कार्यालय बुटवलका  अनुसार भट्टराई लुकिछिपी बसेको भेटिएको र उनको साथबाट अहिलेसम्म कुनै रकम वा जिन्सी भेटिएको छैन । थप सोधपुछका लागि उनलाई ईलाका प्रहरी कार्यालय बुटवलमा राखिएको छ ।