नेपाल र रावलमाथिको कारबाही केन्द्रीय कमिटीले तय गर्ने

शुक्रबारको एमाले संसदीय दलको बैठक

काठमाडौँ : प्रधानमन्त्री एवं नेकपा संसदीय दलका नेता केपी शर्मा ओलीले वरिष्ठ नेता माधव नेपाल र  उपाध्यक्ष भीम रावलमाथिको कारबाही केन्द्रीय कमिटीले तय गर्ने बताएका छन् । शुक्रबार बालुवाटारमा बसेको एमाले संसदीय दलको बैठकमा बोल्दै ओलीले दुबै नेताको स्पष्टिकरण कारवाहीको भागिदार योग्य रहेका बताएका हुन् । 

संसदीय दलका प्रमुख सचेतक विशाल भट्टराईका अनुसार बैठकमा ओलीले वरिष्ठ नेता नेपाल र उपाध्यक्ष रावलको जवाफ कारबाहीको भागिदार योग्य भएको बताउँदै कारबाही कुन प्रकृतिको हुन्छ भन्ने विषय केन्द्रीय कमिटीको बैठकबाट तय हुनेसमेत बताएका छन् । फागुन २३ को अदालतको फैसलापछि केही सांसदहरु अनुपस्थित हुँदै आएकोमा शुक्रबारको बैठकमा सहभागी हुनु सकारात्मक भएको भट्टराईले बताए ।

बैठकमा अर्थमन्त्री विष्णु पौडेलले बजेट निर्माणको बारेमा सांसदहरुको सुझाव माग गरेकोसमेत उनले बताए । बैठकमा नेपाल समूहका नेता घनश्याम भुसाल र  योगेश भट्टराईले ओलीले नै एकताको प्रयास गर्नुपर्ने धारणा राख्दै २८ गतेका निर्णय फिर्ता लिनुपर्ने माग गरे पनि ओलीले भने निर्णय फिर्ता हुनै नसक्ने बताएको भट्टराईले जानकारी दिए । संसदीय दलको विधान भने संशोधन गर्न सकिने ओलीको धारणा रहेको भट्टराईले बताए ।

बैठकपछि योगेश भट्टराईले फागुन २३ को अदालतको फैसलापछि पार्टीलाई पूर्ववत अवस्थामा फर्काइएको अवस्थामा २०७५ जेष्ठ दुई गतेको अवस्थामा फर्केकाले त्यहीबाट नै पार्टी अघि बढ्नुपर्नेमा जोड दिएका थिए । त्यस्तै संयम र धैर्यका साथ एमालेलाई अघि बढाउनुपर्नेमा आफुहरुको धारणा रहेको उनले बताए ।
बैठकमा एमाले बरिष्ठ नेता झलनाथ खनालले पार्टी एकता जोगाउन २०७५ जेठ २ गतेको सांगठनक संरचनामा फर्किन पार्टी अध्यक्ष एवं प्रधानमन्त्री ओलीलाई आग्रह गरेका थिए । शुक्रबारका बैठकमा एमालेका असन्तुष्ट पक्षहरु पनि सहभागी भएका थिए ।