नान्टेसलाई २२ वर्षपछि फ्रेन्च कपको उपाधि

काठमाडौँ -  नान्टेसले २२ वर्षमा पहिलो पटक फ्रेन्च कप फुटबलको उपाधि जितेको छ । स्टेड डी फ्रान्समा भएको फाइनल खेलमा नान्टेसले नाइसलाई १-० गोलअन्तरले पराजित गर्दै दुई दशक भन्दा बढी समयपछि पहिलो पटक उपाधि जितेको हो ।

नान्टेसलाई उपाधि दिलाउन एकमात्र निर्णायक गोल लुडोभिक ब्लासले गरे । लुडोभिकले ४७ औँ मिनेटमा पेनाल्टीमार्फत गोल गरेका थिए । नाइसका हिचाम बोडाउईले पेनाल्टी क्षेत्रमा बललाई हातले छोएपछि नान्टेसले पेनाल्टी पाएको थियो ।

नान्टेसले चौंथो पटक फ्रेन्च कपको उपाधि जितेको हो भने सन् २००१ मा फ्रेन्च लिग वानको उपाधि जितेपछि पहिलो पटक मुख्य उपाधि हात पारेको हो ।

त्यतिमात्र नभएर उपाधिसँगै नान्टेसले आगामी सिजनको युरोपा लिगमा स्थान सुरक्षित गरेको छ जुन नान्टेसका लागि २० वर्षमा पहिलो अवसर हो ।