सरकारका विषयमा कांग्रेसले अब  मुख खोल्नु पर्छ : बालकृष्ण खाँण

बुटवल : नेपाली कांग्रेसका केन्द्रीय सदस्य एवं प्रमुख सचेतक बालकृष्ण खाणले देश राजनीतिकरुपमा अनिर्णयको बन्दी बनेका बेला कांग्रेस पार्टी मौन बस्‍न नहुने बताएका छन् । बुटवलमा आयोजित र अन्तरक्रियामा बोल्दै नेता खाँणले लोकतान्त्रिक शक्ति धेरै समय चुप लागेर बस्‍न नहुने बताए ।उनले देशलाई निकास दिन कांग्रेसले ठोस निर्णय गर्नुपर्ने बताउँदै कांग्रेस जनताको भावना विपरित नजाने बताए । 

खाँणले असंबैधानिक रुपमा प्रतिनिधिसभा विघटन गर्ने प्रधानमन्त्रीलाई एक मिनेट पनि सत्तामा रहने नैतिक अधिकार नभएको बताउँदै संविधानमाथि नै प्रहार गर्ने पक्षसँग सहकार्य हुन नसक्नेसमेत बताए । ‘संविधान नमान्नेलाई प्रधानमन्त्री बन्ने हक छैन' उनले भने ।

उनले जनताको अधिकार र संविधान रक्षा सरकारको पहिलो दायित्वबाट सरकार चुकेको बताए । राणा तथा प्राचीन कालका शासकले पनि जनताको जीवन रक्षाका लागि जिम्मेवार हुने गरेको तर लोकतान्त्रिक प्रणालीमा पनि वर्तमान सरकार जनता र संविधानप्रती उत्तरदायी नरहेको आरोप लगाए । राजनीतिक गतिरोध अन्त्यका लागि संविधान र लोकतन्त्रको रक्षा गर्ने दलसँग सहकार्य गर्ने खाणको भनाइ छ ।