भरतपुरमा रेनु दाहाललाई भोट मागेपछि सन्दिप क्षेत्रीलाई गाली

काठमाडौँ - ५ गठबन्धनबाट उम्मेदवार बनेकी माओवादीकी रेनु दाहाललाई जिताउन प्रधानमन्त्री, पूर्व प्रधानमन्त्री सबै कम्मर कसेर लागेका छन् । बिहीबार रेनुकै विजय सुनिश्चित गर्न प्रधानमन्त्री शेरबहादुर देउवादेखि प्रचण्डसम्मले रेनुलाई भोट नदिए देश नै संकटमा पर्ने चेतावनी दिए । उनीहरुले दिएको धम्किको चर्चा बेग्लै छ तर यही मञ्चबाट कमेडियन सन्दिप क्षेत्रीले पनि रेनु दाहालको पक्षमा भोट मागेपछि सन्दिप क्षेत्री भने शुभचिन्तकको निसानामा परेका छन् । 

दिग्गज नेतासँगै मञ्चमा बसेका सन्दिप क्षेत्रीले आफू कुनै पार्टीको झण्डामा नरहेको भन्दै रेनुको विकास देखेर भोट माग्न आएको बताएका थिए । नेताभन्दा चर्को स्वरमा भाषण गरेका उनले सकी नसकी तिहारका कुरादेखि लिएर आमाले पनि आफूलाई रेनुका लागि भोट माग्न स्वीकृति दिएको बताएका थिए । सन्दिपको यो भाषण सामाजिक सञ्जालमा भाइरल बन्यो । कला क्षेत्रकै कतिले सन्दिपको भाषणलाई नरुचाएर फेसबुकमा सुझाव दिइरहेका छन् । कतिले भने सन्दिपलाई कसले किनेर त्यहाँसम्म पुर्यायो भनेर पनि प्रश्न गरिरहेका छन् । 

सन्दिप त्यहाँ पुग्नुलाई धेरैले संयोग मानेका छैनन् । केही समयपहिले सन्दिपलाई प्रचण्डकै घरमा देखिएको थियो । तर रेनुसँग नजिक बनाउन भने चितवनमा निरन्तर कार्यक्रम गरिरहने गृहेन्द्र घिमिरेको हात रहेको धेरैको अनुमान छ । सात प्रदेशमा कलाकार लिएर हिँड्ने गृहन्द्रले सप्तरंग नामको कार्यक्रम वर्षमा एक चोटि आयोजना गर्छन् र केही समय पहिले उनकै प्रयत्नमा सेलिब्रेटी र क्रिकेटरबीच चितवनको रंगशालामा क्रिकेट खेलको आयोजना गरिएको थियो । यिनै गृहेन्द्रसँग नजिक रहेका सन्दिप उनकै संगतमा मञ्चसम्म पुगेको धेरैको अनुमान छ । 

स्थानीय निकायको चुनावको सरगर्मी सुरु भएसँगै कलाकार राजनीतिमा सल्बलाउन थालेका थिए । करिष्मा मानन्धर एमाले प्रवेश गरिन् भने भर्खरै मात्र भुवन केसी र श्वेता खड्का कांग्रेस प्रवेश गरे । तर कोमल वलीबाहेक आजसम्म कसैले पनि पार्टीबाट खास लाभ लिन पाएका छैनन् । बरु उल्टै प्रयोग भएको महसुस भएर थकथकी मानेर बसेका छन् । यस्तोमा सन्दिप क्षेत्री पनि खुलेर अगाडि आएपछि धेरैले उनको कलाकारिताको चिन्ता गर्दै अहिले नै कुनै पार्टीको फेर नसमातेको भए हुने भन्ने टिप्पणी गरिरहेका छन् ।