हिजो चुनाव जिताउन एउटै मोर्चामा, अहिले मेयरका प्रतिष्पर्धी

मकवानपुर– आसन्न स्थानीय तहको निर्वाचनमा हेटौंडा उपमहानगरपालिकाको मेयर पदका लागि चुनावी मैदानमा होमिएका दुई उम्मेदवार राजनीतिक सहकर्मी परेका छन् । ८ महिना अघिसम्म एकै राजनीतिक दलमा सहकार्य गरिरहेका उनीहरुबीच नै हेटौडामा कडा प्रतिष्पर्धा हुने देखिएको छ ।

यसअघि नेकपा एमालेमा रहेकाहरु पार्टी विभाजनपछि यो चुनावका प्रतिष्पर्धी बनेका हुन् । नेकपा एमालेको उम्मेदवार अनन्त पौडेल र नेकपा एकीकृत समाजवादीको जिल्ला उपाध्यक्ष गठबन्धनको साझा उम्मेदवार मिनाकुमारी लामा बीचको चुनावी भिडन्त रोचक हुने भएको छ । गठबन्धनपछि हेटौंडामा मेयरको भाग एकिकृत समाजवादीकोमा परेको थियो ।

हेटौडा बागमती प्रदेशको एक मात्रै उपमहानगरपालिका हो । त्यसैले दलहरुले प्रतिष्ठाको रुपमा हेरेका छन् । सत्तागठबन्धनको तर्फबाट साझा उम्मेदवारी बनेकी लामाको राजनीतिक आधार भूमि एमाले नै हो । एमालेबाट राजनीतिक यात्रामा लामो संघर्ष गरेकी लामा हाल समाजवादीमा छिन् । स्थानीय तहको निर्वाचन २०७४ मा माओवादी र कांग्रेस गठबन्धनकोविरुद्ध एमालेबाट उपमेरकी उम्मेदवार बनेकी लामाले ६ हजार ४२६ मतअन्तरमा विजयी हासिल गरेकी थिइन् । आसन्न निर्वाचनमा भने उही कांग्रेस, माओवादीलगायतको गठबन्धनबाट साझा उम्मेदवार हुन् लामा । 

पौडेल र लामा विगतमा नेकपा एमालेमा हुँदा अनेक कालखण्डमासँगै थिए । अनन्त पौडेलले पार्टीको जिल्ला कमिटी नेतृत्व गर्दा लामाले विद्यार्थी आन्दोलनमा सहभागी हुँदै राजनीतिक यात्राको थालनी गरेकी थिइन् । पौडेलले जिल्ला कमिटीको नेतृत्वमा हुँदा लामा जनवर्गिय संगठनमा थिइन् ।

२०४६ जनआन्दोलनमा पौडेल पार्टीबाट आन्दोलन सञ्चालन प्रविधि कार्यदलको अग्रेणी नेतृत्वमा थिए भने लामा विद्यार्थी राजनीतिमा पार्टीको निर्देशनमा थिइन् ।
२०५२ सालमा लामा अनेरास्ववियुको जिल्ला कमिटी कोषाध्यक्ष हुँदा पौडेलले विद्यार्थीमा राजनीतिक उर्जा भर्दथे, लामा त्यसको नेतृत्व गर्थिन् । २०६४ को संविधान सभाको निर्वाचनमा पौडेललाई पार्टीले उम्मेदवार बनायो । लामा पौडेललगायत पार्टीको उम्मेदवारलाई जिताउन लागि परिन् । तर पार्टीले जिल्लाको ४ वटै क्षेत्रमा चुनाव हार्‍यो ।

२०७० को संविधान सभाको दोस्रो निर्वाचनमा पौडेललाई जिताउन लामाले आफ्नो भूमिका पुनः निर्वाह गरिन् । पौडेलले निर्वाचन जिते ।

२०७२ मा नेपाल लोकतान्त्रिक आदिवासी जनजाति महासंघको केन्द्रीय सदस्य भएकी लामाले पार्टीमा आफ्नो परिधि फराकिलो गर्दै आइन् । २०७४ को स्थानीय तहको निर्वाचनमा लामालाई उममेयर जिताउन पौडेलले विशेष भूमिका निर्वाह गरे । लामालगायत जिल्लामा बहुमत एमाले उम्मेदवारले जित हासिल गरे । 
२०७८ सालमा एमाले विभाजन हुँदा लामाले नेकपा एकीकृत रोजिन् भने पौडेल एमालेमा अडिग छन् । अब आसन्न निर्वाचनमा उनै पौडेल र लामा मेयरको पदमा आपसमा प्रतिष्पर्धी बनेका छन् ।

‘तर हामीलाई अफ्ठ्यारो छैन’ पौडेलले भने ‘अहिले हामी आपसमा प्रतिष्पर्धी भयौ, यो व्यक्तिगत कुरा हैन,पार्टीको कुरा भयो’ । 

‘राजनीतिमा स्थायी शत्रु र मित्रु भन्ने हुँदैन।’ यता लामा भन्छिन्, ‘दाईहरुसँगै चुनावी मैदानमा आउने अवसर मिल्नु मेरो लागि गौरवको कुरा पनि हो’
यता पार्टी अध्यक्ष एकालाल श्रेष्ठले हेटौंडामा पार्टी विभाजनको असर कम भएको बताए । एकीकृत समाजवादीको भागमा परेको स्थानीय तहमा एमालेलाई सजिलै जित्ने विश्वास लिएको उनले बताए ।

दुबै उम्मेदवारहरु हाल आ–आफ्नो जितका लागि चुनावी दौडधुपमा रहेका छन् । दुवैले आफू र आफ्नो पार्टीको जित सुनिश्चित भएको दाबी गर्दै आएका छन् । चुनावी प्रचारमा लागेकी मिना र अनन्त दुबैले आफूहरुलाई भोट हाल्नुपर्ने कारण सहितको प्रतिबद्धता पत्र बाँड्दै मतदान गर्न आग्रह गर्दै आएका छन् ।