सरकारले 'लकडाउन' र सीमानाका बन्द गर्नेतर्फ सोचेको छैन : अर्थमन्त्री पौडेल

फाइल तस्‍वीर

काठमाडौँ : अर्थमन्त्री विष्णुप्रसाद पौडेलले कोभिड संक्रमण रोकथामका लागि लकडाउन नहुने स्पष्ट पारेका छन् । कोभिड–१९ को दोस्रो लहरबाट जोगिनुपर्ने अवस्था सँगसँगै आर्थिक सामाजिक क्रियाकलापलाई नियमित गर्नुपर्ने भएकाले लकडाउन र सीमानाका बन्द गर्नेतर्फ सरकारले नसोचेको उनले बताए । तर, स्वास्थ्य मापदण्डलाई भने कडाइका साथ पालना गराउने उनको भनाइ छ । 

‘हामी आशंका होइन यथार्थबाट निर्देशित भएरअघि बढ्नुपर्छ,’ उनले भने, ‘कोभिडको दोस्रो लहरको चर्चा चलिरहेको छ । त्यसबाट हामी जोगिनु पर्नेछ । अर्कोतर्फ आर्थिक सामाजिक क्रियाकलापलाई नियमित र सूचारु पनि गर्नुपर्ने आवश्यकता छ । त्यसकारण हामी आर्थिक, सामाजिक क्रियाकलापलाई सूचारु पनि गर्छौं, नियमित पनि गर्छौं र स्वास्थ्य मापदण्डलाई ख्याल गरेरअघि बढ्छौं । अहिले सरकारले सीमानाका बन्द गर्ने, लकडाउन गर्नेतर्फ सोचेको छैन । त्यो अहिले उपयुक्त पनि हुँदैन ।’