संगम र अस्मिताको लोकपप ‘हावासँगै’ सार्वजनिक

काठमाडौँ -संगम थपलिया र अस्मिता अधिकारीको युगल गायन रहेको गीत ‘हावासँगै’ सार्वजनिक भएको छ । लोकपप शैलीको गीतमा तारा अधिकारीको शब्द रचना र किशोर विश्वकर्माको संगीत रहेको छ । 

सानैदेखि गायनमा रुचि राख्ने संगमले गाएको यो दोस्रो गीत हो । यसअघि उनले किशोर विश्वकर्माकै संगीतमा ‘तिमी मुस्कुराउँदा’ बोलको गीत सार्वजनिक गरेका थिए । दर्शकले सो गीत रुचाएपछि यही उत्साहले उनले दोस्रो गीत सार्वजनिक गरेको संगमको भनाइ छ । 

आस्था कला केन्द्रमा उमेशराज खड्कासँग स्वरको कक्षा लिएका संगम भविष्यमा सबैखाले गीत गाउन इच्छुक छन् । तर अहिले नृत्य शैलीका गीत श्रोता दर्शकको रुचिमा रहेकाले यस्तै गीतबाट आफूलाई निखार्न लागिपरेको संगम बताउँछन् ।

‘भोलिका दिनमा त मलाई सबै खाले गीत गाउन मन छ । तर अनुभवका लागि लोकपप शैलीका गीत गरिरहेको हुँ । यो विधा मलाई मन पर्छ र दर्शकले पनि यस्तै गीत रुचाउने गर्नुभएको छ,’ संगम भन्छन् ।

संगमलाई यस्तै शैलीको गीत गाउने नेपथ्य ब्यान्ड त्यही भएर सबैभन्दा बढी मन पर्छ । सार्वजनिक गीतमा करिष्मा ढकाल र सुरज थपलियाको अभिनय रहेको छ । गीतको निर्देशन कमल राईले गरेका हुन् । शिवराम थपलियाको प्रस्तुति रहेको गीतको छायांकन शिव ढकालले गरेका हुन् ।