बागमती प्रदेश सभा चैत्र अन्तिममा बस्‍ने

हेटौंडाः बागमती प्रदेश सभाको बैठक यही चैत्र अन्तिम साता बोलाइने तयारी भएको छ । प्रदेश सभाका सभामुख सानुकुमार श्रेष्ठले दलहरुसँग छलफल गरेर बैठक बोलाउने जानकारी दिए । 

संसदमा मुख्यमन्त्री डोरमणि पौडेलविरुद्धको अविश्वासको प्रस्ताव यसअघि टेबल भइसकेको छ ।  तत्कालीन नेपाल कम्युनिष्ट पार्टी (नेकपा) का ४५ सांसदहरूले हस्ताक्षर गरेर मुख्यमन्त्री पौडेलमाथि अविश्वासको प्रस्ताव संसदमा टेबल गरेका थिए । 

नेकपा खारेज भएपछि नेकपा एमाले एक भएर अघि बढ्नुपर्ने प्रदेशका पूर्वमन्त्री तथा सांसद अरुण नेपालले बताए । नेकपा रहँदा मुख्यमन्त्रीविरुद्धको अविश्वासको प्रस्तावमा उनले आफ्नो समर्थन जनाएका थिए ।  

मुख्यमन्त्री डोरमणि पौडलविरुद्ध अविश्वासको प्रस्ताव संसदमा टेबल गर्नु एक परिस्थिति भए पनि अहिलेको राजनीतिक अवस्था फरक भएको उनले बताए ।  
एमाले ब्यूतिएपछि सबै मिलेर अघि बढ्नुपर्नेमा उनले जोड दिए । मुख्यमन्त्री डोरमणि पौडेलविरुद्धको अविश्वासको प्रस्ताव फिर्ता लिनेबारे भने छलफल भइरहेको उनले बताए ।