तिलोत्तमामा फोहोर व्यवस्थापन शुल्क हटाउने घोषणा

बुटवल - अहिले कायम रहेको प्रतिघर फोहोर व्यवस्थापन शुल्क हटाउने घोषणासहित रुपन्देहीको तिलोत्तमा नगरपालिकामा गठबन्धनले आफ्नो प्रतिबद्धता पत्र सार्वजनिक गरेको छ ।

नेपाली कांग्रेस र माओवादी केन्द्रबीच तालमेल भएको नगरपालिकामा दुई दलले बिहीबार संयुक्त प्रतिबद्धतापत्र सार्वजनिक गरेका हुन् । प्रतिबद्धतापत्रमा उद्योग व्यवसाय प्रवर्द्धनका लागि जीर्ण उद्योग व्यवसायले तिर्न बाँकी रहेको बक्याैता रकमको ५० प्रतिशत शुल्क मिनाहा गरिदिने उल्लेख छ ।

यस्तै तालिमप्राप्त वा १२ कक्षा उत्तीर्ण युवाहरूलाई बिनाधितो ४ प्रतिशत व्याजमा ऋण दिएर व्यवसायमा लगाउने गठबन्धनको उद्घोष छ । नगरभित्र रहेका सबै प्रकारका हिंसा अन्त्य गर्न सबै वडाहरुमा हेल्पडेक्स राख्ने समेत दलको प्रतिबद्धता छ ।

प्रशासन विज्ञहरुद्वारा नगर र वडा कार्यालय संचालन तथा व्यवस्थापन कार्ययोजना बनाएर लागू गर्ने प्रतिबद्धता जनाएका छन् । स्थानीय तह निर्वाचनमा यहाँ प्रमुखमा कांग्रेसका रामकृष्ण खाँण र उपप्रमुखमा माओवादी केन्द्रका हेमन्त पाण्डेले उमेदवारी दिएका छन् ।