२ किलो सुनका तयारी गहनासहित २३ तोला काँचो सुन चोरी

बुटवल- बुटवलमा ठूलो परिमाणमा सुनचाँदी चोरी भएको छ । बुटवल उपमहानगरपालिका-६ बीपी चोकमा रहेको कोटेश्वर गुल्मेली मजुवा सुनचाँदी पसलबाट २ किलो सुनका तयारी गहनासहित २३ तोला काँचो सुन र नगद ५ लाख रुपैयाँ चोरी भएको रुपन्देही प्रहरीले बताएको छ ।

जिल्ला प्रहरी कार्यालय रुपन्देहीका प्रवक्ता डिएसपी नवरत्न पौडेलले गएराति सुनचाँदी पसल फोडेर सुनका गरगहनासहित नगद चोरी भएको बताए । पसल सञ्‍चालक डिलबहादुर सुनारका अनुसार रातको समयमा वेल्डिङ्ग मेसिनको प्रयोग गरी तालाचाबी फुटाएर पसलका गरगहना र नगद चोरी गरिएको बताए ।

चोरी गर्ने व्यक्ति सिसिटिभि फुटेजमा स्पष्ट देखिएको र योजनाबद्ध रुपले चोरी गरिएको दाबी सुनारले गरेका छन् । साँझ पसल बन्द गरेर घर गएका पसल सञ्‍चालकहरूले बिहान बल्ल चोरीको घटना थाहा पाएर प्रहरीलाई जानकारी गराएका थिए ।