श्रेयस ऐयरले आइपीएलका सुरुवाती खेल गुमाउने

काठमाडौँ: भारतीय ब्याट्सम्यान श्रेयस ऐयरले इंगल्यान्डविरुद्धको बाँकी ओडीआई गुमाउने भएका छन् । दुई टिमबीच पुनेमा सुरु भएको ओडीआई श्रृङ्खला अन्तर्गतको पहिलो खेलमा मंगलबार काँधको चोट बोकेका ऐयरले इन्डियन प्रिमियर लिग (आइपीएल) का सुरुवाती खेलहरू पनि गुमाउने बताइएको छ । 

भारतीय क्रिकेट बोर्ड (बीसीसीआई) ले एयेरका विषयमा केही सूचना दिएको छैन । यद्यपि इएसपीन क्रिक इन्फोले भने कयौँ साता मैदान बाहिर रहने बताएको छ । जसका कारण उनले आइपीएलका आधा खेल गुमाउन सक्ने अनुमान गरिएको छ । ऐयरको चोटले तत्कालका लागि भारतीय टिमलाई गहिरो असर नपर्ने अपेक्षा गरिएको छ । बेन्चमा सूर्य कुमार यादव र शुभम गिल जस्ता खेलाडी भएकाले एयेरको चोटले इंगल्यान्डसँगका बाँकी खेलमा लागि बनाइएको भारतीय रणनीतिमा खासै परिवर्तन गर्नुपर्ने छैन । 

ऐयर पछिल्लो छ महिनामा दाेस्रो पटक काँधको चोटले पिडित बनेका हुन् । यसअघि उनी अस्ट्रेलिया भ्रमणमा पनि घाइते बनेका थिए । ऐयर मैदान बाहिर रहने भएपछि आइपीएलमा दिल्ली क्यापिटल्सको कप्तानी रिषभ पन्तले गर्नेछन् ।