एमालेले गठन गर्‍यो प्रदेश-१ सभामा संसदीय बोर्ड

विराटनगर : नेकपा एमालेले प्रदेश-१ सभामा पार्टीको संसदीय बोर्ड गठन गरेको छ । एमाले प्रदेश-१ को संसदीय दलको बैठकले १५ सदस्यीय संसदीय बोर्ड गठन गर्ने निर्णय गरेको हो । 

बोर्डमा ४ पदेन सदस्य हुन्छन् भने ११ जना मनोनयन गरिनेछ । बोर्डमा दलको नेता, उपनेता, प्रमुख सचेतक र सचेतक पदेन सदस्य रहने विधानमा व्यवस्था गरिएको छ । एमाले प्रदेश-१ का संसदीय दलका नेता शेरधन राई मुख्यमन्त्री छन् । 

बुधबार बिहान बसेको संसदीय दलको बैठकले मुख्यमन्त्री शेरधन राईविरुद्धको अविश्वास प्रस्ताव दर्ता गराउँदा हस्ताक्षर गरेका सांसदलाई हस्ताक्षर फिर्ता लिन सात दिनको समयसीमा दिएको छ । 

बैठकले अविश्वास प्रस्तावमा हस्ताक्षर गर्ने सांसदलाई समर्थन फिर्ता गर्न लिखित निर्देशन दिने निर्णय गरेको दलका नेता राईले जानकारी दिए । राईले भने, ‘संसदीय दलको बैठकले दलको विधान पारित गर्ने, आफ्नो दलको नेताविरुद्ध सदनमा टेबल भएको अविश्वास प्रस्तावमा हस्ताक्षर गर्ने सांसदलाई सो फिर्ता गर्न निर्देशन दिने र संसदीय बोर्ड गठन गर्ने निर्णय भएको छ ।’

सर्वोच्च अदालतले नेकपालाई अवैधानिक ठहर्‍याएपछि दलको बैठक आज पहिलो पटक बसेको हो ।

हस्ताक्षर गर्ने सांसदहरूलाई सात दिनभित्र हस्ताक्षर फिर्ता लिन बुधबार नै लिखित पत्र पठाइने एमाले प्रमुख सचेतक बुद्धिकुमार राजभण्डारीले बताए । राजभण्डारीले दलको बैठकमा नेकपा माओवादी केन्द्रका उपनेता टंक आङबुहाङसहित मुख्यमन्त्री राईविरुद्धको अविश्वास प्रस्तावमा हस्ताक्षर गर्ने केही सांसदहरू उपस्थित रहेको जानकारी दिए । 

नेकपा एमालेको संसदीय दलको बुधबारको बैठकमा माधव नेपाल समूहका सांसद भीम आचार्य, सांसद राजेन्द्र राई, जीवन घिमिरेलगायत सांसद भने सहभागी थिएनन । तर, लीलावल्लभ अधिकारी र तुलसी न्यौपाने सहभागी थिए । प्रदेशसभामा नेकपा एमालेको एकल वहुमत छ । बुधबारको बैठकमा ५१ मध्ये ३० जना सांसद सहभागी रहेको प्रमुख सचेतक राजभण्डारीले बताए । उनका अनुसार अब उपनेता र सचेतक पनि चयन गरिने छ ।