मेयरमा उठ्न दुई प्रदेशसभा सांसदद्वारा राजीनामा

विराटनगर । प्रदेश १ का दुई जना प्रदेशसभा सदस्यले पदबाट राजिनामा दिएका छन् । इलामको क्षेत्र नम्बर १ (ख) का काजिमान कागते र झापाको क्षेत्र नम्बर १ (ख) का गोपालचन्द्र बुढाथोकीले आइतबार प्रदेशसभाका सभामुखलाई सम्बोधन गरेर राजीनामा दिएका हुन् ।

दुबै सांसद नेकपा एमालेका हुन् । कागतेले इलामको सुर्योदय नगरपालिकाको मेयर र बुढाथोकीले झापाको मेचीनगर नगरपालिकाको मेयरमा उठ्न टिकट पाएका हुन् ।

प्रदेश १ को प्रदेशसभामा एमाले प्रमुख प्रतिपक्षी दल हो । दुई सांसदले राजिनामा दिएपछि प्रदेशसभाका एमालेका सांसदको संख्या ३८ कायम भएको छ । दुबै सांसदले राजीनामा दिएपछि उनीहरुको सांसद पद रिक्त भएको सुचना प्रदेशसभा सचिवालयले निकालिसकेको प्रदेशसभाका सचिव गोपाल पराजुलीले जानकारी दिए।