‘के घर के डेरा’का लागि दीपेन्द्रले लिए ३५ लाख

काठमाडौँ - केही दिनअघि दोस्रो पटक घोषणा भएको फिल्म ‘के घर के डेरा’का लागि निर्देशक दीपेन्द्र के खनालले ३५ लाख पारिश्रमिक लिएका छन् । उनले यही महिनाको अन्त्यबाट फ्लोरमा जाने फिल्मका लागि ३५ लाख पारिश्रमिक लिने सम्झौता भएको बताएका छन् ।

दीपेन्द्र निर्माण टिमसँग महंगो रकममा सम्झौता भएको स्वीकार गर्दै महामारीका कारण लामो समय काम नगरेकोले चल्तीको रकमभन्दा बढी रकम लिएको बताए । ‘मेरो पेसा नै यही । तीन वर्ष भो काम गरेको छैन । जीविकाको लागि पनि त्यति रकम त चाहियो नी,’ दीपेन्द्रले भने ।

दीपेन्द्रले यो फिल्ममा सुव्रत आचार्यलाई प्रतिस्थापन गरेका हुन् । महामारीअघि यो फिल्म सुव्रत आचार्यले निर्देशन गर्ने गरी कलाकारसहित घोषणा भएको थियो । केही दिनअघि दीपेन्द्रले कप्तानी सम्हालेसँगै फेरि यो फिल्मको घोषणा भएको थियो ।

दीपेन्द्रले लेखनको काम भइरहेको बताउँदै यसमा सन्तुष्ट भएसँगै फ्लोरमा निस्कने जानकारी गराए । ‘पटकथालाई अझै परिमार्जन गर्ने काम गरिरहेका छौँ । यो काम सकिएसँगै फ्लोरमा निस्किन्छौँ,’ उनले भने ।

महेश दवाडीको पटकथा तथा संवाद रहेको फिल्ममा दयाहाङ राई, विपिन कार्की, वर्षा राउत, सुरक्षा पन्तm रविन्द्र झा आदि कलाकारको अभिनय रहनेछ । निर्माण टिमले शुक्रबार मात्र अभिनेत्रीमा सुरक्षा पन्तलाई अनुबन्ध गरेको थियो । दयाहाङ राईले ‘दुई नम्बरी’को सुटिङ सकाएसँगै यो फिल्मको सुटिङ सुरु हुनेछ । दया अहिले पोखराको ल्वाङमा यो फिल्मको सुटिङ गरिरहेका छन् ।