फोहरको व्यवस्थापन घरबाटै

फाइल फोटो

चितवन - वातावरण संरक्षणका लागि फोहोरको व्यवस्थापन घरबाट नै गर्नुपर्ने एक कार्यक्रममा सहभागीले बताएका छन् । 

भरतपुर महानगरपालिकाले आज यहाँ आयोजना गरेको वातावरण संरक्षण र फोहरमैला व्यवस्थापनसम्बन्धी बृहत् प्रदर्शनी तथा अन्तरक्रिया कार्यक्रमका  वक्ताहरुले घरबाट निस्किएका फोहरलाई वर्गीकरण गरी व्यवस्थापन गर्न सकिने बताए । घरबाट निस्किने फोहोरलाई वर्गीकरण गर्दै प्राङ्गारिक मल र पुनःप्रयोग गर्न सकिने उनीहरुको भनाइ थियो । 

भरतपुर महानगरपालिका प्रमुख रेनु दाहालले घरबाट निस्कने फोहोरलाई व्यवस्थापन अहिलेको चुनौति बनेको बताइन् । घररघरबाट निस्किने फोहर व्यवस्थापनमा स्वयं घरधनी लाग्ने हो भने वातावरण संरक्षण र फोहरमैलाको व्यवस्थापन हुने उनको भनाइ थियो । अहिले महानगरमा दैनिक ७० टन फोहर उत्पादन हुँदै आएको र त्यसमा ५० प्रतिशत कुहिने फोहर हुने गरेको उनको भनाइ थियो । 

यसको व्यवस्थापनका लागि महानगरपालिकाले टोलटोलमा अभियान सञ्चालन गरेको भए पनि प्रभावकारी बन्न केही समय लाग्ने उनले बताइन् । उनले भनिन्, `घरबाट निस्कने फोहरलाई घरमा नै व्यवस्थापन गर्ने बानी बसाल्न सकेमा वातावरण पनि सफा हुन्छ ।`

महानगरपालिका उपप्रमुख पार्वती शाह ठकुरीले फोहर व्यवस्थापनका लागि महानगरपालिकाले आमा समूह तथा टोल सुधार समितिलाई तालिम दिएर काम अघि बढाएको बताइन् । 

कुहिने फोहरलाई मलको रुपमा र नकुहिने फोहरले हस्तकला सामग्रीको रुपमा विकास गर्न सकिने उनले बताइन् । ठकुरीले भनिन्, `अब वातावरण संरक्षणमा महिला अघि बढ्नुपर्छ । घरबाट निस्कने फोहरलाई घरमा नै व्यवस्थापन गर्नुपर्छ ।`

कार्यपत्र प्रस्तुत गर्दै तुलसी ज्ञवालीले फोहरलाई स्रोतबाटै व्यवस्थापन गर्न सके वातावरण सफा राख्न सकिने बताए । उनले वातावरण संरक्षणमा सहयोग पुर्‍याउन समुदायस्तरबाटै काम गर्नुपर्ने बताए । रासस