दाहालका कारण कम्युनिस्टहरू रुन बाध्य भए : महेश बस्‍नेत

हेटौंडा : पूर्वमन्त्री तथा एमाले केन्द्रीय सदस्य महेश बस्नेतले माओवादी अध्यक्ष पुष्पकमल दाहालका कारण कम्युनिष्टहरू रुन बाध्य भएको बताएका छन् । बस्नेतले दाहाललाई कम्युनिष्ट आन्दोलनको भष्मासुरको संज्ञासमेत दिए । 

राष्ट्रिय युवा संघ मकवानपुरको सोमबार हेटौंडामा भएको जिल्ला भेलामा बस्नेतले तत्कालिन नेकपा अध्यक्ष तथा प्रधानमन्त्री केपी शर्मामाथि प्रहार हुँदा कम्युनिष्टहरू दाहालका कारण रोएको स्मरण गरे ।
 
दाहालले कठित जनयुद्धको नाममा १७ हजार जनताको हत्या गरेको, चन्दा नदिएको नाममा शिक्षकहरूलाई झुण्डाएको,  सहयोग नगरेको नाममा सर्वसाधारणको हत्या गरेको आरोप दाहालले लगाए । तर, अहिले दाहालको घेरामा लडाकु, सहिदका परिवार, घाइते तथा पिडितका परिवार नपरेको उनको भनाइ छ । 

‘अहिले उनको वरिपरि आफ्नै छोरीहरू, ज्वाईहरू, आफन्त, माफिया, ठेकेदारमात्रै छन् । सशस्त्र द्वन्द्वमा उनलाई साथ दिएका कोही पनि देखिदैनन्,’ बस्‍नेतले भने । 

उनले पार्टी वरिष्ठ नेता माधवकुमार नेपाललाई आत्मालोचना गर्दै सरकारमा सहभागी हुन आग्रह गरे । एमाले कम्युनिष्ट आन्दोलनको गम्भीर मोडमा आइपुगेको भन्दै युवाहरूलाई जोस जागरले कार्य गर्न उनले निर्देशन दिए ।