ग्रेट हिमालयले नियुक्त गर्‍यो श्रीलंकन प्रशिक्षक

काठमाडौँ – ग्रेट हिमालय क्रिकेट एकेडेमीले श्रीलंकाका मिहिराज वासान्थालाई कन्सल्टेन्ट ब्याटिङ प्रशिक्षक नियुक्त गरेको छ । मिहिराज आईसीसी लेभल थ्री प्रशिक्षक हुन् र उनीसँग १५ वर्ष भन्दा बढीसम्म प्रशिक्षण गरेको अनुभव छ । 

ग्रेट हिमालयले जनाए अनुसार मिहिराजले श्रीलंका, दुबई, बेलायत र भारतमा प्रशिक्षण गरिसकेका छन् । उनी पछिल्लो समय भारतको बैङ्ग्लोरमा रहेको सिन्स क्रिकेट एकेडेमीका मुख्य प्रशिक्षकको रुपमा काम गरेका थिए । 

मिहिराजले श्रीलंकाको महिला क्रिकेट टिमको सहायक प्रशिक्षकको रुपमा समेत काम गरिसकेका छन् । उनले सन् १९९९ देखि २००१ सम्म श्रीलंकाको फस्ट क्लब क्रिकेट खेलेका थिए । 

ग्रेट हिमालयले मिहिराजलाई मे देखि जुलाईसम्म तीन महिनाका लागि प्रशिक्षक नियुक्त गरिएको तथा उनले हात्तिबन र शान्तिनगरमा रहेको एकेडेमीमा प्रशिक्षण दिनेछन् ।