कैलालीको गौरीगङ्गा नगरपालिकामा काँग्रेसले गठबन्धन नगर्ने

कैलाली - आसन्न वैशाख ३० गते हुने निर्वाचनका लागि केन्द्रमा सत्तारुढ दलहरूले गठबन्धन गर्ने निर्णय गरेका बेला जिल्लामा भने काँग्रेसीहरू गठबन्धन नगर्ने निर्णय गरिरहेका छन् । कैलालीको गौरीगङ्गा नगरपालिकामा काँग्रेसले गठबन्धन नगर्ने निर्णय गरेको हो ।

काँग्रेस गौरीगङ्गा नगर समितिले जिल्ला, प्रदेश र केन्द्रलाई पठाएको पत्रमा भनिएको छ, ‘केन्द्रीय कार्यसमिति र जिल्ला कार्य समितिको सहमतिप्रति गौरीगङ्गा नगर समितिको मङ्गलवार बसेको बैठकको ध्यानाकर्षण भएको छ ।’ गौरीगङ्गामा गठबन्धन आवश्यकता नरहेको काँग्रेस क्षेत्र, प्रदेश र केन्द्रलाई पठाएको पत्रमा उल्लेख गरेको छ ।

नगरसभापति पहलविक्रम चन्द र सचिव हेमन्तराज जोशी (बाजे) द्वारा हस्ताक्षरित विज्ञप्तिमा आसन्न वैशाख ३० मा हुने निर्वाचनमा गठबन्धन गर्दा पदीय भागबण्डा र काँग्रेसमा प्रतिकुल असर पर्ने तथा आम कार्यकर्तामा झन् निराशा छाउँदै गएको भन्दै सिङ्गो नगरमा काँग्रेस एकजुट, एकत्रित भई गठबन्धनको आवश्यकता नरहेको निर्णय भएको उल्लेख छ ।

यस्तै, एक्लै चुनाव प्रतिस्पर्धामा जाँदा सम्मानजनक सफलता प्राप्त हुने हुँदा नगरको कुनै पनि वडा वा नगरमा कुनै प्रकारका गठबन्धन स्वीकार्य नहुने बताएको छ ।