सृष्टि केसीलाई 'कम्युनिकेटर अवार्ड' प्रदान गर्दै साइटेसन २०२२ सम्पन्न

काठमाडौँ - टोस्ट मास्टर्स नेपालद्वारा आयोजित 'साइटेसन २०२२' सम्पन्न भएको छ । काठमाडौँमा आयोजित उक्त कार्यक्रममा विभिन्न व्यावसायिक संघ–संस्था तथा अन्य समुदायका सदस्यहरु सहभागी थिए ।

साइटेसनमा प्रसिद्ध अभिनेत्री मनिषा कोइराला कि–नोट स्पिकरको रुपमा रहेकी थिइन् । उनले महिला अधिकार र महिला हिंसा विरुद्ध हुने अभियानलगायत अन्य सामाजिक कार्यहरुमा सक्रिय रुपमा सहभागी हुँदै आएकी छिन् । २०१३ मा क्यान्सरको सफल उपचारपछि उनले आफ्नो भोगाइ र त्यसबाट प्राप्त ज्ञानलाई क्यान्सरविरुद्ध लडिरहेका अन्य बिरामीहरुलाई हौसला दिइरहेकी छिन् ।

टोस्ट मास्टर्सले हरेक वर्ष उत्कृष्ट नेतृत्व र सञ्चार क्षमताको लागि एक जनालाई 'कम्युनिकेटर अवार्ड' प्रदान गर्दै आएको छ । प्रसिद्ध मोटिभेसनल स्पिकर र ब्लाइन्ड रक्सकी संस्थापक सृष्‍टि केसीलाई यस वर्ष यो अवार्ड प्रदान गरिएको छ । १६ वर्षकै उमेरमा ग्लुकोमाको कारण आँखाको ज्योति गुमाए पनि उनले इन्टरमिडियट र स्नातक तहमा गोल्ड मेडल हासिल गर्न सफल भएकी थिइन् । उनको संघर्षमा आधारित बायोपिक सिनेमा 'ब्लाइन्ड रक्स' सन् २०१८ मा विश्वव्यापी रुपमा प्रदर्शन भएको थियो ।

उनले भनिन्, 'यो अवार्ड ग्रहण गर्न पाउँदा म गौरवान्वित भएको छु । मेरो काम र उपलब्धिलाई सम्मान गरेकोमा टोस्टमास्टर्सप्रति आभार प्रकट गर्दछु । साथै मैले यसै वर्षदेखि टोस्टमास्टर हुने पनि निर्णय गरेको छु ।'

उत्तर र पूर्वी भारत, नेपाल, बंगलादेश र भुटानका क्लबहरू समावेश रहेको डिस्ट्रिक्ट ४१ का डिस्ट्रिक्ट डाइरेक्टर डिस्टिङ्गुइस्ड टोस्टमास्टर रञ्जित आचार्यले भने, 'यो एक ऐतिहासिक कार्यक्रम रहन गयो र उत्तर र पूर्वी भारत, नेपाल, बंगलादेश र भुटानका टोस्टमास्टरहरु एकै ठाउँमा भेला हुने र आफ्नो पर्सनल नेटवर्क विस्तार गर्ने महत्वपूर्ण अवसर पनि थियो । यसले निश्चय नै सबै टोस्टमास्टरहरूलाई एकअर्काको अझ नजिक ल्याउन मद्दत गरेको छ । नेपाल टोस्टमास्टर्सको लागि यो गौरवको विषय हो । टोस्टमास्टर्स इन्टरनेशनलकै सबैभन्दा ठूलो डिस्ट्रिक्टको नेतृत्व गर्न पाउँदा म गौरवान्वित महसूस गर्छु ।'

डिस्ट्रिक्ट ४१ का क्लब ग्रोथ डाइरेक्टर डिस्टिङ्गुइस्ड टोस्टमास्टर सुमन शाक्यले भने, 'साइटेशन २०२२ टोस्टमास्टरहरूको लागि सबैभन्दा ठूलो भेला थियो र यो नेटवर्किङको लागि पनि सुनौलो अवसर थियो । हरेक दिन नयाँ क्लबहरू खुल्दै छन् र हाल नेपालमा ५६ वटा टोस्टमास्टर क्लबहरू रहेका छन् । यो सँग–सँगै हाम्रा सदस्यहरू पनि निरन्तर बढ्दै गइरहेका छन् । यसैलाई ध्यानमा राखेर हामीले अहिले नेपाली भाषामा क्लब पनि खोलेका छौं ।'

डिस्ट्रिक्ट ४१ का डिस्टिङ्गुइस्ड टोस्टमास्टर डिस्ट्रिक्ट प्रोग्राम क्वालिटी डाइरेक्टर अंकुर यादवले भने, ' साइटेसन २०२२ मा सहभागि हुन पाउँदा म एकदमै खुशी छु । यो डिस्ट्रिक्ट ४१ कै सम्पूर्ण सदस्यहरुका लागि महत्वपूर्ण अवसर थियो ।

नेपाली टोस्टमास्टरहरुको एकता देखेर पनि म एकदमै प्रभावित भएको छु ।' नेपाल टोस्टमास्टरका कोअर्डिनेटर डिस्टिङ्गुइस्ड टोस्टमास्टर मून प्रधानले सम्पूर्ण कार्यक्रमको संयोजन गरेकी थिइन् ।