रुपन्देहीका दुई पालिका प्रमुखले गाडी फिर्ता गरे

बुटवल - निर्वाचन आयोगले चुनाव लड्ने जनप्रतिनिधिले पदबाट राजीनामा दिने र सेवा सुविधा त्याग्नु पर्ने बताइरहेको बेला रुपन्देहीमा पनि दुई पालिका प्रमुखले आफू चढ्ने सवारी साधन पालिकामा फिर्ता गरेका छन् ।

रूपन्देहीको शुद्धोधन र सियारी गाउँपालिकाका अध्यक्षहरूले आफूहरूले प्रयोग गर्दै गाडी फिर्ता गरेका हुन् । सियारी गाउँपालिकाका अध्यक्ष अयोध्या थारू र शुद्धोधन गाउँपालिकाका अध्यक्ष किशुनचन्द चौधरीले जनप्रतिनिधि भएपछि आफूले लिँदै आएको सेवा सुविधा त्याग गरेको बताए ।

स्थानीय तहको निर्वाचन घोषणा भएसँगै पार्टीको निर्वाचनको लागि खटिनुपर्ने र जनप्रतिनिधिको रूपमा पाएको सेवा सुविधा लिएर पार्टीको काममा खटिनु उचित नहुने भएकोले सेवा–सुविधा त्याग गरेको चौधरी र थारूले बताए । 

२०७४ साल जेठ १४ गते भएको स्थानीय तहको निर्वाचनमा दुवै जना नेकपा एमालेको तर्फबाट अध्यक्षमा निर्वाचित भएका थिए । सियारी र शुद्धोधनमा आगामी निर्वाचनको लागि समेत थारू र चौधरी दुवै जनाले अध्यक्षमा आकांक्षा देखाएका छन् ।