कियराको हातमा अर्को फिल्म, रनवीरसँग बन्नेछ जोडी

मुम्बई : ‘कबीर सिंह’को सफलतासँगै कियरा आडवानीको व्यस्तता ह्वात्तै बढेको छ । दिनहुँ नयाँ नयाँ फिल्ममा अनुबन्ध भएको समाचार आइरहेका छन् । हाल वरुण धवनसँग ‘जुग जुग जियो’को सुटिङ गरिरहेकी कियरा रनवीर सिंहको मुख्य भूमिका रहने फिल्मका लागि पनि छनोटमा परेकी छिन् ।

दक्षिण भारतीय निर्देशन शंकरको निर्देशनमा बन्ने लागेको फिल्म ‘अन्नियन’को रिमेकमा शंकरले रनवीरको जोडीको रुपमा कियरालाई छानेका हुन् । सन् २००५ मा रिलिज भएको फिल्ममा विक्रमले मुख्य भूमिका निर्वाह गरेका थिए । थ्रीलर विधाको यो फिल्ममा विक्रमको जोडीको रुपमा साधाले अभिनय गरेकी थिइन् । 

तर, यो फिल्मको सुटिङ तत्कालै सुरु हुने अवस्था भने छैन । कियरा ‘भुलभुलैया २’को सुटिङ सकेपछि यो फिल्मका लागि उपलब्ध हुनेछिन् भने रनवीर यो बीचमा करण जौहरको निर्देशनमा बन्ने फिल्मको सुटिङ सकाउनेछन् । ‘अपरिचित’रुपमा हिन्दीमा डब भएको यो फिल्म युट्युब र टेलिभिजनमा खुबै रुचाइएको फिल्मभित्र पर्छ ।