सुरक्षाकर्मी अहिंस्रक बन्‍नुपर्छ : छेकम्पार र चुम्चेतबासी

काठमाडौँ  : तिब्बतसँग सीमा जोडिएका उत्तरी गोरखाका स्थानीयले सुरक्षाकर्मीलाई अहिंसा क्षेत्रको नियम पालना गराउन सरकारको ध्यानाकर्षण गराएका छन् । तिब्बतको सीमा नजिकै चुमनुब्री गाउँपालिका ७ छेकम्पारमा सशस्त्र प्रहरीको बोर्डर आउटपोस्ट (बीओपी) स्थापना हुने भएसँगै स्थानीयले गृहमन्त्रीलाई ज्ञापन पत्र बुझाएर ध्यानाकर्षण गराएका हुन् ।  

चुमनुब्री गाउँपालिका ६ चुम्चेत र वडा नम्बर ७ छेकम्पार अहिंसा क्षेत्र हो । त्यहाँका स्थानीयले यी क्षेत्रमा काटमार नगर्ने, डढेलो नलगाउने, मह नकाढ्ने, शिकार नखेल्ने, पशुवध गर्न नपाउने जस्ता काम नगर्ने प्रतिवद्धता गरेका छन् । त्यस क्षेत्रलाई तत्कालिन प्रधानमन्त्री डा.बाबुराम भट्टराईले २०६९ सालमा अहिंसा क्षेत्रको रुपमा मान्यता दिएका थिए । 

‘हामीले गृहमन्त्रीलाई ज्ञापन पत्र बुझाएर यहाँ आउने सुरक्षाकर्मीले पनि स्थानीय नियम मान्नैपर्ने विषयमा ध्यानाकर्षण गरायौँ,’ चुम श्याग्या (अहिंसा) संरक्षण समितिका संरक्षक निमा लामाले भने, ‘हाम्रो क्षेत्र त एक शताब्दी भन्दा धेरै पहिलेदेखि हिंसा नहुने क्षेत्र हो त्यसैले हामीले ज्ञापनपत्र बुझायौँ । सीमावर्ती क्षेत्रमा सीमा सुरक्षा चाहिन्छ नै । हामी त्यसको लागि सहयोग गर्न तयार छौँ । चुम उपत्यका अहिंसा क्षेत्र हो । चुमको यो संस्कारलाई संरक्षण र सम्वद्र्धन गर्न सरकारको प्रतिवद्धता छ  भनेर भन्नु भएको छ ।’ लामाले गृहमन्त्री थापाले आफ्ना मातहतका सुरक्षा निकायलाई अहिंसा क्षेत्रको विषयमा जानकारी गराउने र त्यहाँको नीति नियमबारे जानकारीसहित निर्देशन दिने प्रतिवद्धता गरेको पनि बताए ।