गभर्नर अधिकारीलाई निलम्बन गर्ने सरकारको निर्णय, पूर्वन्यायाधीशको अध्यक्षतामा जाँचबुझ समिति

काठमाडौँ– मन्त्रिपरिषद्को बिहीबारको बैठकले नेपाल राष्ट्र बैंकका गभर्नर महाप्रसाद अधिकारीमाथि छानबिन गर्न न्यायिक समिति गठन गरेको छ । न्यायिक समिति गठन भएसँगै उनी निलम्बनमा परेका हुन् । सर्वाेच्च अदालतका पूर्वन्यायाधीश पुरुषाेत्तम भण्डारीकाे अध्यक्षतामा जाँचबुझ समिति गठन गर्ने मन्त्रिपरिषद्ले निर्णय गरेकाे थियाे । 

नेपाल राष्ट्र बैंकका सञ्चालक सुबोधकुमार कर्णले एक वाणिज्य बैंकको मर्जर प्रक्रिया छिटो टुंग्याउने भए केही व्यक्तिगत शर्त पूरा गर्नु भन्ने सन्देश उक्त बैंकको सञ्चालकलाई पठाएका थिए । सोही मेसेज पछि गभर्नरको मोबाइलमा फरवार्ड भएको र उनले त्यसमा कुनै प्रत्युत्तर नदिएको बताइएको छ । 

कर्णले गभर्नरको संरक्षणमा काम गरेको भन्ने व्याख्या गर्दै अर्थमन्त्री जनार्दन शर्मा उनीमाथि खनिएका थिए । राष्ट्र बैंक ऐन, २०५८ मा न्यायकि समितिमार्फत् जाँचबुझ समिति गठन गर्न सक्ने प्रावधान छ । सरकारले साेही आधारलाई टेकेर जाँचबुझ समिति बनाएकाे बताइएकाे छ । 

त्यसो त शुरुवातदेखि नै अर्थमन्त्री र गभर्नरबीच राम्रो सम्बन्ध छैन । अर्थमन्त्री शर्माले प्रतिस्थापन विधेयक नल्याइ मौद्रिक नीति नल्याउन भन्दै यो वर्षको केन्द्रीय बैंकको मौद्रिक नीति समेत एक महिना ढिलो गराएका थिए । 

शर्माले सार्वजनिक कार्यक्रममा नै गभर्नरले आफूलाई असफल बनाउन खोजेको भन्दै तुष पोख्दै आएका थिए । 

पछिल्लो समय राष्ट्र बैंकले अर्थतन्त्रका सम्बन्धमा गलत सन्देश फैलाएको अर्थमन्त्रीले बताउँदै आएका थिए । अछामका एक व्यवसायी पृथ्वी शाहको अमेरिकाबाट आएको १२ लाख अमेरिकी डलर अर्थमन्त्रीको दबाबका बीच रोक्का राखेको भन्दै अर्थमन्त्रीले प्रतिशोध साँध्दै आएका छन् । 

पूर्व अर्थसचिव रामेश्वरप्रसाद खनालले सरकारले गभर्नर निलम्बन गर्ने निर्णय गरेको भए त्यो दुर्भाग्यपूर्ण हुने बताएका छन् । तर सञ्चार तथा सूचना प्रविधिमन्त्री ज्ञानेन्द्रबहादुर कार्कीले मन्त्रिपरिषद् बैठकमा यस्तो निर्णय भएको आफूलाई जानकारी नभएको बताएका छन् । 

‘भएका निर्णय त मैले सञ्चारमाध्यमलाई ब्रिफिङ गरिहाल्छु नि,’ उनले भने, ‘ती बाहेक अरु विषय मलाई थाहा हुने कुरा भएन ।’ 

अधिकारीलाई निलम्बन गरेर सरकारले वरिष्ठ डेपुटी गभर्नर नीलम ढुंगानालाई कायममुकायम गभर्नरको जिम्मेवारी दिएकाे छ । गभर्नर अधिकारीले दुई वर्षअघि आजकै दिन राष्ट्र बैंकको गभर्नर पदमा पदबहाली गरेका थिए ।