पुलिसमाथि पुस स्पोर्टसको रोमाञ्चक जित, सचिनले लिए ६ विकेट

काठमाडौँ – प्रो क्लब च्याम्पियनशीप क्रिकेटमा भारतको पुस स्पोर्टस दिल्लीले नेपाल पुलिस क्लबमाथि एक रनको रोमाञ्चक जित हात पारेको छ । भैरहवाको सिद्धार्थ रंगशालामा शुक्रबार भएको खेलमा १ सय ३४ रनको लक्ष्य पछ्याएको पुलिस निर्धारित २० ओभरमा ९ विकेट गुमाउदै १ सय ३२ रनमात्र जोड्न सक्यो । 

जितका लागि पुलिसलाई अन्तिम ओभरमा १९ रनको आवश्यकता रहेको थियो । स्ट्राइकमा रहेका गुल्सन झाले इशान पाण्डेले गरेको पहिलो बलका चौका र त्यसपछि लगातार दुई छक्का प्रहार गरे । तर चौथो बलमा भने इशानले गुल्सनको विकेट हात पार्यो ।  

अन्तिम दुई बलमा पुलिसलाई ३ रनको आवश्यकता भएपनि सागर ढकालले पा“चौ बल डट खेले भने अन्तिम बलमा केवल एक रन ल्याए । पुलिसका लागि गुल्सन झाले सर्वाधिक ३६ तथा पवन सर्राफले ३३ रन बनाए । पुस स्पोर्टसलाई जित दिलाउन सचिन कुमारले सर्वाधिक ६ विकेट हात पारे । भिशेष सारोहाले २ तथा इशान पाण्डेले १ विकेट लिए । 

यस अघि टस जितेर पहिले ब्याटिङ गरेको पुस स्पोर्टसले ८ विकेट गुमाएर १ सय ३३ रन जोडेको थियो । पुस स्पोर्टसका लागि आदित्य जैनले सर्वाधिक ३८ तथा मयंक गुप्ताले २३ रन जोडे । पुलिसका लागि मन्जित श्रेष्ठले सर्वाधिक ४ तथा पवन सर्राफले २ विकेट हात पारे ।