बार्सिलोनाको आधा दर्जन गोल, एथलेटिको पनि विजयी

काठमाडौँ : स्पेनिस ला लिगा फुटबलमा बार्सिलोनाले फराकिलो जित दर्ता गरेको छ । आइतबार राती भएको खेलमा बार्सिलोनाले रियल सोसिडाडलाई ६–१ गोल अन्तरले पराजित गरेको हो । बार्सिलोनालाई जिताउन लियोनल मेस्सी र सर्जियो डेस्टले समान दुई–दुई गोल गरे । यस्तै एन्टोइन ग्रिजमन र औसमाने डेम्बेलेले एक–एक गोल गरे ।

सोसिडाडका एन्डर ब्यारेनटेक्जाले एक गोल फर्काए । जितपछि बार्सिलोना २८ खेलबाट ६२ अंकसहित लिगको दोस्रो स्थानमा उक्लिएको छ । यस्तै आइतबार राती नै भएको अर्को खेलमा शीर्ष स्थानको एथलेटिको म्याड्रिड पनि विजयी भएको छ ।

एथलेटिकोले अलाभेसलाई १-० गोलले हरायो । एथलेटिकोलाई जिताउन एक मात्रै गोल लुइस स्वारेजले गरे । उनले खेलको ५४ औँ मिनेटमा गोल गरेका हुन् । जितपछि एथलेटिकोको ६६ अंक भएको छ । एथलेटिकोले दोस्रो स्थानको बार्सिलोनासँग चार अंकको अग्रता बढाएको छ ।