झा दम्पती वेपत्ता प्रकरण : पक्राउ परेकाहरू सार्वजनिक

जनकपुरधाम : महाेत्तरी प्रहरीले वेपता झा दम्पतिकाे घटनामा संलग्‍न रहेकाे आराेपमा पक्राउ परेमा ४ जनालाई सार्वजनिक गरेको छ । पिपरा गाउंपालिका ५ सहाेडवाका रामबाबु यादव, सुरेन्द्र यादव, राजेन्द्र यादव र भारतीय नागरिक बिहार राज्यकाे मधुबनी जिल्ला तरैया ग्राम पंचायतका हरेन्द्र ठाकुर रहेकाे प्रहरीले जनाएकाे छ । आइतबार पत्रकार सम्मेलन गरी जिल्ला प्रहरी कार्यालय महाेत्तरीले उनीहरूलाई सार्वजनिक गरेकाे हाे ।

जिल्ला प्रहरी कार्यालय महोत्तरीले बेपत्ता भएका दम्पतीको अवस्था सार्वजनिक गर्न नसकेपछि सीआइबीले अनुसन्धान थालेको २ दिन नबित्दै चारै जनालाई घटनामा संलग्न रहेको आशंकामा पक्राउ गरी सार्वजनिक गरिएको हाे । झा दम्पत्ति अझै कहाँ छन् खुलेको छैन । उनीहरूको अवस्था अज्ञातनै रहेकाे जिल्ला प्रहरी कार्यालय महोत्तरीका प्रहरी उपरीक्षक दिनेश आचार्यले बताए ।

अभियुक्तहरूकाे घटना संलगन्ता बारे एसपी आचार्यले भने, 'अभियुक्त मध्येका रामबाबुसँग झा दम्पतिबीच जग्गा सम्बन्धी विवादले पटक-पटक झै झग्डा भएकाे र घटनास्थलमा वेपत्ता दम्पतिकाे काेठादेखि रामबाबुकाे घरसम्म र उनकाे घरकाे गेटमा रगतकाे छिटा देखियो ।' 

गत फागुन १० गते घरमै सुतिरहेको अवस्थामा ओछ्यानसहित बेपत्ता भएका महोत्तरीको पिपरा गाउँपालिका-५ का ६५ वर्षीय मोसाफिर झा र उनकी पत्नी ६० वर्षीया गीतादेवी झालाई घरमै सुतीरहेको अवस्थामा ओछ्यानसहितै वेपत्ता पारिएको थियो ।