नेदरल्यान्ड्सविरुद्धको सिरिज न्यूजिल्यान्डले जित्यो

काठमाडौँ – न्यूजिल्यान्डले नेदरल्यान्ड्सविरुद्धको तीन खेलको एकदिवसिय क्रिकेट सिरिज एक खेल अगावै जितेको छ । 

शनिबार ह्यामिल्टनमा भएको दोस्रो खेल १ सय १८ रनले जित्दै न्यूजिल्यान्डले सिरिजमाथि कब्जा जमाएको हो । यस अघि पहिलो खेल न्यूजिल्यान्डले ७ विकेटले जितेको थियो । 

दोस्रो खेलमा न्यूजिल्यान्डले दिएको २ सय ६५ रनको लक्ष्य पछ्याउने क्रममा नेदरल्यान्ड्स ३४ ओभर १ बलमा आलआउट हुदै १ सय ४६ रनमा समेटियो । नेदरल्यान्ड्सका लागि बास डि लिडेले सर्वाधिक ३७ रन जोडे । 

न्यूजिल्यान्डका लागि माइकल ब्रेसवेलले सर्वाधिक ३ विकेट हात पार्दा इश सोधी र कायल जामिसनले दुई–दुई विकेट लिए । 

यस अघि टस हारेर पहिले ब्याटिङ गरेको न्यूजिल्यान्डले कप्तान टम लाथमको अविजित १ सय ४० रनको मदतमा निर्धारित ५० ओभरमा ९ विकेट गुमाएर २ सय ६४ रन जोड्यो । 

नेदरल्यान्ड्सका लागि लोगान भान बिकले सर्वाधिक ४ तथा फ्रेड क्लासेनले ३ विकेट हात पारे ।