बिरामीको मृत्यु भएपछि अत्तरियास्थित पद्‍मा अस्पतालमा तोडफोड

कैलाली - बिरामीको मृत्यु भएपछि अत्तरियास्थित पद्मा अस्पतालमा स्थानीयले तोडफोड गरेका छन् । शुक्रबार साँझ उपचारका लागि आएका बिरामीको अस्पतालको लापरबाहीका कारण मृत्यु भएको भन्दै स्थानीयहरूले तोडफोड गरेका हुन्।

ईलाका प्रहरी कार्यालय मालाखेतीका प्रहरी नायब उपरिक्षक (डिएसपी) नवराज पोखरेलका अनुसार गोदावरी नगरपालिका – ३ का ३८ वर्षीय विनोद कुमार बोहराको मृत्यु भएको हो । डायरियाका बिरामीको अस्पतालले लापरबाही गर्दा मृत्यु भएको भन्दै मृतकका आफन्तले अस्पताल तोडफोड गरेका उनले बताए ।

मृतकका आफन्तले ढुंगा मुडा प्रहार गर्दा अस्पतालको अगाडिको सिसा फुटेको छ भने अस्पताल परिषरमा तनावग्रस्त भएको छ । मृतकका आफन्तहरूले अस्पतालको एम्बुलेन्स समेत तोडफोड गरेका छन् ।

बिरामीको मृत्युको कारण भने खुल्न सकेको छैन । अस्पतालमा तनावग्रस्त स्थिति सिर्जना भएपछि प्रहरी दर्जनौ शेल अश्रु ग्यास समेत प्रहार गरेको छ ।