फेवातालको मापदण्ड ३० मिटर कायम

पोखरा - पोखरा महानगरपालिकाको कार्यपालिका बैठकले पोखरा नगरपालिकाभित्र रहेको तालको नयाँ मापदण्ड कायम गरेको छ । बुधबार बसेको बैठकले फेवातालको मापदण्ड ३० मिटरसहित बाँकी ८ वटा मापदण्ड तोकेको हो ।

उपत्यका नगर विकास समितिको प्रतिवेदनमा कायम गरिएको ६५ मिटर मापदण्डलाई घटाएर ३० मिटर कायम गरिएको हो । मापदण्ड तोक्नका लागि वडा नम्बर १७ का अध्यक्ष तीर्थ अधिकारीको संयोजकत्वमा सिफारिस समिति गठन भएको थियो ।

समितिले लिएको सुझावका आधारमा मापदण्ड तोकिएको संयोजक अधिकारीले जानकारी दिए । ‘फेवातालको सबै मापदण्डमा एकरूपता हुनुपर्छ, फरक फरक हुँदा विरोध आउँछ भनेर हामीले १८/२० वटा रिपोर्टहरूलाई हेरेर बनाएको प्रतिवेदनलाई कार्यपालिकाले सर्वसम्मत पातिर गरेको छ,’ उनले भने ।

उपत्यका नगर विकास समितिले यसअघि ताल विकासका लागि भन्दै नजिकका जग्गा रोक्का राख्ने निर्णय गरेको थियो । तर जग्गाधनीहरूले भने अन्याय भएकोले फुकुवाको माग गरेका थिए ।

कार्यपालिका बैठकले बेगनास र रुपातालको मापण्दड ५५ मिटर कायम गरिएको छ । सरकारले यि तालहरुको मापदण्ड १ सय मिटर तोकेको थियो । तर स्थानीयलाई असर पर्ने भन्दै ५५ मिटरमा झारिएको हो ।

अरु साना तालको मापदण्ड भने २० मिटर कायम गरिएको छ । योसँगै मापदण्ड भन्दा बाहिरका कित्ताको जग्गा फुकुवा गर्नका लागि सम्बन्धित निकायलाई सिफारिस गर्ने निर्णय भएको छ ।