परीक्षणमै सुर्खेत प्याराग्लाइडिङमा आकर्षण

फाइल फोटो

सुर्खेत : परीक्षणकालमै कर्णालीको राजधानी सुर्खेतमा प्याराग्लाइडिङमा आकर्षण बढेको छ । पछिल्लो दुई महिनादेखि सुर्खेतको वीरेन्द्रनगर नगरपालिका १४ स्थित गोठीकाँडा बयलकाँडामा व्यावसायिक प्याराग्लाइडिङको परीक्षण भइरहेको छ ।

सुर्खेतका व्यवसायी पदमबहादुर शाहीले पोखराबाट तीन जना पाइलट ल्याएर सुर्खेतमा व्यवसायिक प्याराग्लाइडिङको परीक्षण सञ्चालन गरेका हुन् । पाइलट किरण सुनुवारका अनुसार अहिलेसम्म दुई सयभन्दा धेरै जनाले प्याराग्लाइडिङ उडान गरेका छन् । 

जसमा एकैदिन ३३ जनासम्मले प्याराग्लाइडिङमा यात्रा गरेको उनले सुनाए । सुर्खेतमा ६ जनासम्म पाइलट आएपनि अहिले दुई जनाले मात्रै नियमित प्याराग्लाइडिङ उडान गरिरहेका हुन् । परीक्षण समय भएपनि प्याराग्लाइडिङमा आकर्षण बढ्दै गएको उनको भनाइ छ । अहिले दैनिक यात्रा गर्ने यात्रुसँगै प्याराग्लाइडिङ हेर्ने मानिसहरुको दैनिकजसो बयलकाँडामा भीड लाग्ने गरेको छ । 

अहिले एक जना यात्रुले उडान गरेबापत तीन हजार पाँच सय रुपैयाँ शुल्क लिने गरिएको छ । त्यसमा यात्रुको फोटो तथा भिडियो पनि उपलब्ध गराउन थप एक हजार रुपैयाँ लिने गरिएको छ । परीक्षण उडान सफल भएमा सुर्खेतमा व्यवसायिक उडान सुरु गरिने व्यवसायी शाहीले बताए । 

पाइलटले सुर्खेतमा व्यवसायिक उडान सम्भव रहेपनि लगानी थप बढ्नुपर्ने बताएका छन् । सुर्खेतमा यसअघि पनि सोही ठाउँबाट परीक्षण उडान गरिएपनि प्याराग्लाइडिङको व्यवसायिक उडान हुन सकेको थिएन ।