डाँडादेखि डाँडा जोड्ने पुष्पलाल मध्य पहाडी लोकमार्ग (फोटो फिचर)

म्याङ्लुङ बजार (तेह्रथुम) - करिब १ हजार ८ सय किलोमिटर लामो पुष्पलाल मध्यपहाडी लोकमार्ग अन्तरगत अहिले पूर्वी खण्डमा धमाधम सडक कालोपत्रे गर्ने काम भइरहेको छ । राष्ट्रिय गौरवको आयोजनाका रूपमा अघि बढेको यो सडक लोकमार्गमा तेह्रथुमको बसन्तपुरदेखि म्याङ्लुङ बजारसम्म तीन खण्डमा कालोपत्रेको काम अघि बढेको हो । 

आयोजना अन्तरगत बसन्तपुरदेखि लसुनेसम्मको १० किलोमिटर सडक कालोपत्रे सम्पन्न भएको पुष्पलाल मध्यपहाडी लोकमार्ग योजना कार्यालय पाँचथरको साइट कार्यालय म्याङ्लुङका सब इन्जिनियर विवश अधिकारीले बताए । यस खण्डमा दुई वर्ष अघिसम्म यात्रा गर्न अत्यन्तै कठिन हुने गरेको थियो ।

त्यसैगरी काँडेदेखि जिरिखिम्तीसम्म ५ किलोमिटर पनि कालोपत्रे अन्तिम चरणमा पुगेको छ । त्यसैगरी जिरिखिम्तीदेखि तेह्रथुम सदरमुकाम म्याङ्लुङसम्मको खण्ड पनि अहिले धमाधम निर्माण भइरहेको अधिकारीले बताए ।

पुष्पलाल मध्यपहाडी लोकमार्ग पूर्वमा पाँचथरको चिवाभन्ज्याङदेखि बैतडीको झुलाघाटसम्म निर्माणाधीन रहेको छ । स्थानीय जमुना सुवेदीका अनुसार लोकमार्गको दुरावस्था हुँदा सडकमै रोपाइँ गरेर बर्षेनी बिरोध हुने गरेको थियो ।

अहिले सडक कालोपत्रे भएपछि बिरामीहरुलाई एम्बुलेन्समा राखेर अस्पताल पुर्याउन सहज भएको छ । तेह्रथुम सदरमुकाम म्याङ्लुङसम्म सरसामान ढुवानीमा सहज भएको छ । साथै यहाँको उत्पादन धनकुटा हुँदै इटहरी र विराटनगर पुर्याउन पनि सजिलो भएको छ । 

निर्माणाधीन पुष्पलाल मध्यपहाडी लोकमार्ग