अध्यक्ष ओली पार्टी विभाजन गर्न लागेका छन् : नेपाल-खनाल समूह

काठमाडौं : नेकपा एमालेको माधवकुमार नेपाल–झलनाथ खनाल समूहले अध्यक्ष केपी शर्मा ओली समूह पार्टी विभाजनको पक्षमा लागेको बताएको छ । बुधबार र बिहीबार भएको आफू पक्षीय नेताहरूको राष्ट्रिय भेलापछि आयोजित पत्रकार सम्मेलनमा प्रचार विभाग प्रमुख योगेश भट्टराईले आफूहरू एकताको पक्षमा उभिएपनि अध्यक्ष ओली विभाजनको पक्षमा देखिएको बताए । 

‘अध्यक्ष ओलीको हिजो एउटा अन्तर्वार्ता सुन्दै थिए, उहाँ अब नेताहरूसँग संवादमै बस्‍नुहुन्‍न रे । वार्तामा नबस्‍ने भन्‍ने व्यक्ति पार्टी विभाजनको पक्षमा लागेको हुन्छ कि हामी,’ प्रचार विभाग प्रमुख भट्टराईले भने, ‘अमेरिकाका राष्ट्रपति र उत्तर कोरियाका नेताबीच त वार्ता हुन्छ । एउटै पार्टीका नेतासँग वार्ता गर्दिन भन्‍ने अध्यक्षको अभिव्यक्ति पार्टी मिलाउने खालको हो कि विभाजन गर्ने ?’

भेलाले २०७५ जेठ २ गतेसम्म रहेको पार्टी केन्द्रीय समिति, जनसंगठन र अन्य भ्रातृसंस्थालाई सक्रिय बनाउने निर्णय पनि गरेको छ । तर, त्यसमा अध्यक्ष ओली समूहले षडयन्त्र गरिरहेको आरोप भट्टराईले लगाए ।  

भेलाले ०७५ जेठ २ गतेपछि भएका कुनै पनि निर्णय नमान्‍ने निर्णयसमेत गरेको छ । र, त्यही समितिका आधारमा बोलाइने बैठकमात्र सहभागी हुने निष्कर्ष पनि भेलाले निकालेको छ । ‘हामी ०७५ जेठ २ को समितिले बोलाउने बैठकमा सहभागी हुन्छौं । सडकबाट थपिने समितिको बैठकमा सहभागी हुँदैनौं,’ भट्टराईले भने ।
   
अध्यक्ष ओली नेतृत्वको सरकारको नीति तथा कार्यक्रम र बजेटले पार्टीको घोषणापत्रमा उल्लेख समाजवादमा जाने नीतिलाई कार्यान्वयन गर्न नसकेको आरोप भेलाले लगाएको छ । 

भेलाले जनताको बहुदलीय जनवादलाई कार्यान्वयन गर्न अबका तीन महिना देशभर प्रशिक्षण र भेला गर्ने निर्णय गरेको छ । यी भेलाहरू भोलिबाटै सुरु गरिने उनले बताए ।