‘नेपाल कम्युनिष्ट पार्टीको मृत्यु भएको दिन शोक गीत बजेन, लोक गीत गाइयो’

फाइल तस्बिर

काठमाडौँ  :  नेपाली कांग्रेसका नेता गगनकुमार थापाले नेकपा एमाले र माओवादी केन्द्र मिलेर बनेको नेपाल कम्युनिष्ट पार्टीको मृत्यु भइसकेकोल कांग्रेसले सरकारको नेतृत्व गर्न दाबी गर्ने बताएका छन् ।  तरुण दल स्याङ्जा भीरकोटले आयोजना गरेको आमसभालाई सम्बोधन गर्दै थापाले नेकपाको मृत्यु भएको दिन मलामी जाने कोही नभएको भन्दै टिप्पणी गरेका हुन् । 

‘नेपाल कम्युनिष्ट पार्टीको मृत्यु भएको दिन मलामी जाने कोही भएन । शोक गित गाइएन लोक गित गाइयो,’ उनले भने, ‘तीन वर्षअघि हाम्रै गाउँमा आएर भन्या होइन गयो कांग्रेस भनेर ? अहिले नेकपाले शासन चलाउने वैैधानिक अधिकार सकियो । संसद्मा अब एमाले, कांग्रेस माओवादी अरु मात्रै छन् ।’ 

थापाले प्रधानमन्त्री केपी शर्मा ओलीसँग शासकीय क्षमता नभएको आरोप लगाए । ‘प्रधानमन्त्री ओलीको शासकीय क्षमता छैन । भत्काउने, संसद्लाई, निर्वाचन आयोगलाई पंगू बनाउनु भएको छ,’ उनले भने, ‘यो बेलामा सरकारमा जानु कांग्रेसको कर्तव्य हो । रहर होइन । कांग्रेसले प्रधानमन्त्रीलाई घर पठाउनु पर्छ । कांग्रेसले सरकार बनाएर निर्वाचनमा जानुपर्छ । कांग्रेसले सरकारको नेतृत्व गर्ने कुरा गर्न मिल्छ मात्रै होइन दाबी गर्छ ।’