‘ओलीलाई आलोचना मन पर्दैन, भजनमण्डलीको चाहना छ’

काठमाडौँ  :  नेकपा एमालेका वरिष्ठ नेता माधवकुमार नेपालले प्रधामन्त्रीसमेत रहेका पार्टी अध्यक्ष केपी शर्मा ओलीसँग आलोचना सहन सक्ने क्षमता नभएको टिप्पणी गरेका छन् । आफ्नो पक्षको भेलालाई काठमाडौँमा सम्बोधन गर्दै नेता नेपालले ओलीलाई आफ्नो भजन गाएको मात्र मन पर्ने बताएका हुन् ।  

‘सबै समस्याको जरो भनेको ओलीमा भएको अहंकार, भजन मण्डलीको चाहना हो । उहाँलाई आलोचना मन पर्दैन,’ उनले भने, ‘सुझाव मन पर्दैन ।’ ओलीले सधैँ विधि र पद्धतीको उल्लंघन गरेको नेपालको आरोप छ । 

‘उहाँले विधि पद्धतीको सँधै उल्लंघन गर्नु भयो । जबजको नारा लगाउँदै निरंकुश प्रवृत्ति हाबी भयो,’ उनले भने, ‘आफ्नो गल्तीको दोष अरुलाई थुपार्ने काम गर्नुभयो । झुट र अपव्याख्याको खेती गर्नुभयो । भ्रम पैदा गर्ने काममा जुटिरहनु भयो ।’ ओलीले आफ्नो व्यक्तिवादी बचाउन र प्रधानमन्त्रीको कुर्सी बचाउन संविधान विपरित काम गरेको नेपालको भनाइ छ ।