'सबै बितण्डाको जिम्मेवार ओली हुन्, प्रमाण चाहिए एकभारी छन्'

काठमाडौँ  : नेकपा एमालेका वरिष्ठ नेता माधवकुमार नेपालले पार्टीको अवस्था संकटपूर्ण रहेको भन्दै त्यसको जिम्मेवारी अध्यक्ष केपी ओली भएको आरोप लगाएका छन् । काठमाडौँमा आफ्नो पक्षको भेलालाई सम्बोधन गर्दै नेता नेपालले यस्तो बताएका हुन् ।  ‘पार्टी कस्तो अवस्थाबाट गुज्रिदैं छ ? सवैको मनमा जिज्ञासा हुनसक्छ । पार्टी संकटपूर्ण अवस्थाबाट गुज्रिरहेको छ । यो कसको कारणले सिर्जना भयो ? यसको जिम्मेवार को हुन् ? यो प्रश्न उत्पन्‍न भएको छ,’ उनले भने, ‘विगतको धेरै चर्चा गर्न चाहन्‍नँ । यो कार्यकर्ता भेला रचनात्मक उद्देश्यका साथ आयोजना गरिएको हो ।’ 

 कम्युनिष्टमा विचार दर्शन र सिद्धान्त भएन भने पार्टी बनाउन नसकिने र अहिले ओलीमा यही भइरहेको उनको आरोप छ ।  ‘यो स्थिति उत्पन्‍न हुनुमा अरु कोही होइन पार्टी अध्यक्ष केपी शर्मा ओली जी, सबै बितण्डाको निम्ति उहाँ नै जिम्मेवार हुनुपर्छ । तथ्य र प्रमाण चाहिन्छ भने एक भारी छन्’ उनले भने । उनले साइबर स्यालहरु ज्युँदै रहेछन् भन्दै टिप्पणी पनि गरे । ‘यो साइबर स्यालहरु अहिले पनि ज्यूँदै रहेछन् । अहिले पनि बाङ्चिगरहेकै रहेछन्,’ उनले भने, ‘अब एमाले पुनर्जीवन पाइसकेपछि पनि ज्यूँदै रहेछ । साइबर स्यालदेखि होसियार ।’