आजदेखि खनाल-नेपाल समूहको राष्ट्रिय कार्यकर्ता भेला

काठमाडौँ : नेकपा एमालेको झलनाथ खनाल-माधव नेपाल समूहको राष्ट्रिय कार्यकर्ता भेला आजदेखि काठमाडौँमा सुरु हुँदैछ । बुधबार र बिहीबार चल्‍ने भेलामा देशभरबाट उक्त समूहका नेता/कार्यकर्ता काठमाडौँ आइसकेका छन् भने कतिपय आउँदैछन् । आज विहान ११ बजे ललितपुरको सानेपास्थित हेरिटेज गार्डेनमा भेला आयोजना गरिएको नेपाल निकट एमाले नेता विष्णु रिजालले जानकारी दिए ।

केही दिनअघि प्रधानमन्त्रीसमेत रहेका पार्टी अध्यक्ष केपी शर्मा ओलीसँग नेपाल समूहले छलफल गरेको थियो । तर छलफल सकरात्मक नभएपछि यो समूहले राष्ट्रिय कार्यकर्ता भेला नरोक्‍ने निर्णय गरेको थियो । ओलीसँगको छलफलपछि नेता नेपालले सोमबार आफ्नो समूहका केन्द्रीय सदस्य, सांसदलगायतलाई ब्रिफिङ गरेका थिए । 

अध्यक्ष ओलीले नेपाल समूहका नेताहरूको जिम्‍मेवारी खोसेका थिए । पार्टीमा ओलीले एकलौटी गरेपछि नेपाल समूहले भेला आयोजना गरेको हो । आफु निकट नेताहरूसँग नेता नेपालले प्रधानमन्त्री ओलीले फागुन २८ गतेको निर्णयको विषयमा कुरा उठेपछि त्यो निर्णयबाट आफू पछि नहट्ने भन्दै जंगिएको बताएका थिए । नेता नेपालले सहकार्य सहज नरहेको बैठकमा बिफ्रिङ गरेका थिए ।

मंगलबार ओली समूहका तर्फबाट महासचिव ईश्वर पोखरेलले विज्ञप्ति जारी गर्दै राष्ट्रिय भेला आयोजना गरिएको भनी प्रचारित सूचनाप्रति पार्टीको गम्भीर ध्यानाकर्षण भएको जनाएका छन् । अनुशासनहीन गुटगत भेलामा सहभागी भए संविधान, पार्टी र संसदीय दलको विधानको व्यवस्था एवं नियमावली बमोजिम अगाडि बढ्ने महासचिव पोखरेलले विज्ञप्तिमा उल्लेख गरेका छन् ।

‘अनाधिकृत गुटगत भेला नगर्न/नगराउन, भेला आयोजनाको भ्रम नफैलाउन, र कसैले बेलाएमा पनि त्यस्तो अनुशासनहीन गुटगत भेलामा सहभागी नहुने नेकपा (एमाले) सबै नेता÷कार्यकर्ताहरूलाई विशेष निर्देशन गर्दछ,’ विज्ञप्तिमा उल्लेख छ, ‘अन्यथा, मुलुकको संविधान, पार्टी र संसदीय दलको विधानको व्यवस्था एवं नियमावली बमोजिम हुने कुरा पनि स्पष्ट गरिन्छ ।’

सर्वोच्‍च अदालतले एमाले ब्युँताएपछि चर्को विवाद छ । केही दिनअघि मात्रै ओलीले नेपाल समूहका केही नेतालाई हटाएका थिए । नेपाल समूहका केही प्रदेश प्रमुखसमेत ओलीले हटाएपछि नेपाल समूहले केन्द्रदेखि स्थानीय तहसम्म समानान्तर कमिटी घोषणा गर्ने बताएका थिए । सात वटै प्रदेशमा नेपाल समूहले आफ्‍नै समानान्तर कमिटी घोषणा गरेको छ ।