मेयर अतिथि, राउटे मुखिया प्रमुख अतिथि

नेपालगञ्ज आइपुगेका राउटे मुखिया सुर्यनारायण शाही । फोटो : मुक्ति उप्रेति

नेपालगञ्ज : नेपालगञ्जमा बिहीबारदेखि सुरु हुन लागेको वेष्टर्न ट्राभल मार्ट कार्यक्रमको प्रमुख अतिथि राउटे मुखिया सूर्यनारायण शाही रहेका रहने भएका छन् । नेपालगञ्जको सिद्धार्थ होटलमा बिहीबारदेखि सुरु हुन लागेको ट्राभल मार्टको प्रमुख अतिथि राउटे मुखिया शाही रहन लागेका हुन् ।

कार्यक्रम उद्घाटन गर्न राउटे मुखिया शाही सल्यानबाट नेपालगञ्ज आएर होटल स्टारलाइनमा बसेका छन् । उनीसहित अरु पाँच जना राउटे पनि आएका छन् ।

कार्यक्रममा नेपालगञ्ज उपमहानगरपालिकाका मेयर धवल शमशेर राणा र पर्यटन बोर्डका सीइओ विशेष अतिथि छन् । यस्तै आयोजक नाट्टा बाँकेका अध्यक्ष श्रीराम सिग्देल सभापति र केन्द्रीय अध्यक्ष अच्युत गुरागाईँ अतिथि छन् । 

कार्यक्रममा देशभरका पर्यटन व्यवसायी सहभागी छन् । यस्तै सातै प्रदेश सरकारका प्रतिनिधि पनि मार्टमा आएका छन् । सातै प्रदेश सरकारका स्टल पनि मार्टमा राखिएका छन् । उनीहरूले पश्चिम नेपालको पर्यटन विकासका लागि आयोजना गरिएको मार्टमा आ-आफ्नो क्षेत्रको पर्यटकीय क्षेत्रको प्रचार प्रसार गर्नेछन् ।

मार्टका लागि भारतबाट झण्डै ६० जना पर्यटन व्यवसायी आएका छन् । कार्यक्रमलाई नेपाल पर्यटन बोर्ड, नाट्टा नेपाल, हान, टिबानलगायतका संस्थाले पनि व्यवस्थापन गरेका छन् । मार्ट तीन दिनसम्म चल्नेछ ।