सचिवलाई कारबाही माग्दै मुख्यमन्त्रीलाई मन्त्रीको पत्र

सुर्खेत : सचिवलाई कारबाही गर्नु पर्ने माग गर्दै कर्णाली प्रदेशका सामाजिक विकास मन्त्री दल रावलले मुख्यमन्त्री महेन्द्रबहादुर शाहीलाई पत्र पठाएका छन् । सामाजिक विकास मन्त्रालयमा गत साउनमा आएका सचिव लोकनाथ पौडेललाई कारबाहीको माग गर्दै पत्र पठाएका हुन् । मन्त्रालयको काम नगरेर व्यक्तिगत लाभ हुने काम गरेको भन्दै कारबाहीको माग गर्दै मन्त्री रावलले  २३ फागुनमा पत्र लेखेका थिए । 

मन्त्रालयको काम ठप्प भएपछि आफ्नै मन्त्रालयका सचिवलाई कारबाही गर्न माग  मुख्यमन्त्रीलाई पत्र लेख्‍न बाध्य भएको मन्त्री रावलले बताए । मन्त्री रावलले सचिव पौडेलले पदबहाली गरेको समयदेखि नै मन्त्रालयको कामकाज भन्दा व्यक्तिगत कामलाई मात्र महत्व दिएको, पदीय जिम्मेवारी, दायित्व र कर्तव्यलाई सिरानीमा हालेको मन्त्रीले लेखेको पत्रमा उल्लेख छ । चालू आर्थिक वर्षको दोस्रो चौमासिक सकिन लाग्दा पनि मन्त्रालयका कुनै काम अघि नबढेपछि पत्र लेख्‍न बाध्य भएको मन्त्री रावलले बताए । 

‘सचिव पौडेलले मन्त्रालयमा बहाली भएदेखि नै मन्त्रालयको कामलाई भन्दा आफ्नो व्यक्तिगत कामलाई मात्र महत्व दिइएको पाइयो’ मन्त्रीले पत्रमा लेखेका छन्, ‘सचिव पदको जिम्मेवारी, दायित्व र कर्तव्यलाई सिरानीमा हालेर आर्थिक वर्षको अन्तिमतिर आउँदा पनि मन्त्रालयको काममा सिन्को भाँच्ने सम्मको काम नगरेको पाइयो ।’

सचिवले काम नगर्दा मन्त्रालयको कार्यसम्पादन प्रगति कमजोर देखिएको पत्रमा उल्लेख छ । ‘मन्त्रालयको कार्य सम्पादन प्रगति एकदमै कमजोर देखिएकाले सचिवलाई संघीय मामिला तथा सामान्य प्रशासन मन्त्रालयमा फिर्ता पठाउन आवश्यक कदम चाल्न र कारबाही अगाडि बढाउन मुख्यमन्त्री ज्यूलाई अनुरोध गर्दछु’ मन्त्रीको पत्रमा उल्लेख छ ।

चालु आर्थिक वर्षको दोस्रो चौमासिकसम्म सामाजिक विकास मन्त्रालयको पुँजीगत खर्च तीन प्रतिशत मात्रै छ । मन्त्रालयसँग रहेको पुँजीगततर्फको एक खर्ब ४२ करोड २० लाख १४ हजार मध्ये चार करोड ५९ लाख ३० हजार एक सय ५१ रुपैयाँ मात्रै खर्च भएको छ ।

मन्त्री रावलको पत्रका आधारमा मुख्यमन्त्री तथा मन्त्रिपरिषद्को कार्यालयले आवश्यक कारबाही र सरुवाका लागि संघीय मामिला तथा सामान्य प्रशासन मन्त्रालयसँग समन्वय गरेपछि सचिव पौडेललाई लुम्बिनी प्रदेश प्रमुखको कार्यालयमा काजमा सरुवा गरेको छ ।