आमिर खानले छाडे ट्वीटर र इन्स्टाग्राम

मुम्बई : बलिउड अभिनेता आमिर खानले सोसल मिडिया छाडेको घोषणा गरेका छन् । उनले सोमबार दिउँसो ट्वीटरबाट अन्तिम पोस्ट लेख्दै आइन्दा आफू व्यक्तिगत अकाउन्टमा नदेखिने बताएका हुन् । उनले आफू र आफ्ना फिल्म सम्बन्धी जानकारी आमिर खान प्रडक्सनको अफिसियल अकाउन्टबाट प्रवाहित हुने पनि जानकारी गराएका छन् । 

अघिल्लो दिन मात्र जन्मदिन मनाएका उनले भोलिपल्ट यस्तो घोषणा गरेका हुन् । यो घोषणासँगै आमिर ट्वीटर र इन्स्टाग्राम दुवैतिरबाट गायब भएका हुन् ।
आमिर खान यतिबेला ‘लाल सिंह चढ्ढा’को सुटिङ गरिरहेका छन् ।

यो हलिउड फिल्म ‘फरेस्ट गम्प’को आधिकारिक रिमेक हो । फिल्ममा करिना कपुर पनि मुख्य भूमिकामा छिन् । यो पछि भने उनले गर्ने फिल्मको बारेमा खास जानकारी बाहिर आएको छैन । उनले तमिल फिल्म ‘विक्रम वेधा’को रिमेकमा काम गर्ने बताए पनि पछि यो फिल्मबाट हात झिकेका थिए ।

यसैगरि ‘महाभारत’बनाउने घोषणा गरेका आमिरले सम्भावित विवादलाई ध्यानमा राख्दै यो फिल्म पनि नबनाउने संकेत गरेका छन् । ‘लाल सिंह चढ्ढा’ यो वर्षको अन्तिममा रिलिज हुने चर्चा छ ।