रोकिएन पीएसजीका खेलाडीका घरमा डकैती, डि मारियाको घरमा फेरि लुटपाट

काठमाडौँ : फ्रेन्च लिग वानमा आइतबार पेरिस सेन्ट जर्मेन (पीएसजी) ले न्यान्ट्ससँग २-१ को अप्रत्याशित हार ब्यहोर्‍यो । पीएसजी टिम र समर्थकलाई हारबाहेक अर्को खबरले पनि निराश बनायो । त्यो खबर थियो, पीएसजीका विङ्गर एंगल डि मारियाको घरमा भएको डकैती । 

पीएसजीको घरेलु मैदानमै भइरहेको खेल १-१ को बराबरीको अवस्थामा थियो । प्रशिक्षक माउरिसियो पाचेटिनोले डि मारियालाई ६२ औँ मिनेटमा परिवर्तन गरे । डि मारियाको स्थानमा प्रवेश गर्ने अर्जेन्टिनाकै लियान्द्रो पाराडेस थिए । परिवर्तनको कारण थियो डि मारियाको घरमा भएको डकैतीको खबर ।

डि मारियाले खेलमा उच्चस्तरको प्रदर्शन गरिरहेका थिए । खेल बराबरीमा अघि बढिरहे पनि डि मारियाको बलमा खेल आफ्नो कब्जामा पार्ने धेयमा थियो । त्यही बेला पीएसजीका स्र्पोटिङ निर्देशक लियोनार्दोले पोचेटिनोलाई खबर दिए । अनि पोचेटिनोले डि मारियालाई मैदान बाहिर बोलाइयो । डि मारियाको घरमा भएको डकैतीको खबरले पीएसजीको प्रदर्शनमै असर पुगेको प्रष्ट देखिन्थ्यो । 

त्यसो त हिजो डि मारियाको घरमा मात्रै होइन, पीएसजीकै अर्का खेलाडी मार्किन्योसको घरमा पनि डकैती भएको फ्रेन्च सञ्चार माध्यमले जनाएका छन् । पीएसजीका खेलाडीहरूको घरमा डकैती भएको यो पहिलो पटक होइन । पछिल्ला १८ महिनामा गोलरक्षक सर्जियो रिको, पूर्व रक्षक थियागो सिल्भा, स्ट्राइकर एरिक मोटिङ लगायतका खेलाडीहरुको घरमा पनि यसअघि लुटपाटका घटना घटेका थिए । 

डि मारिया त झन् बारम्बार डकैतीको सिकार भइरहेका छन् । उनी म्यानचेस्टर युनाइटेडमा हुँदा पनि लुटपाटबाट पीडित भएका थिए । घरमा डकैती भएकै कारणले पनि डि मारियालाई म्यानचेस्टर छाड्न प्रेरित गरेको भनाई छ ।