माओवादीको आज पनि केन्द्रीय कार्यसमिति बैठक बस्‍दै

फाइल तस्बिर

काठमाडौँ : नेकपा माओवादी केन्द्रको केन्द्रीय कार्यसमिति बैठक आज पनि बस्दैछ । बिहान ११ बजे पार्टी केन्द्रीय कार्यालय पेरिसडाँडामा बैठक बस्‍न लागेको हो ।

आइतबार पार्टी कार्यालय पेरिसडाँडामा करिब ४ घन्टा बसेको बैठकमा प्रदेशका नेताहरूले आफ्नो प्रदेशको अवस्थाबारे रिपोर्टिङ गरेका थिए । आइतबारको बैठकमा प्रदेश १ बाट सावित्री भुषाल, २ बाट विश्वनाथ साह, बागमतीबाट नारायण दाहाल, गण्डकीबाट हितराज पाण्डे, लुम्बिनीबाट ओनसरी घर्ती, कर्णालीबाट माया शर्मा र सुदूरपश्चिमबाट नेपबहादुर चौधरीले रिपोर्टिङ गरेका थिए ।

आजको बैठकमा एमालेमा लागेका नेताहरूलाई कारबाही, सत्ता समीकरण, सरकारलाई दिएको समर्थन र पार्टीको आगामी रणनीतिबारे छलफल हुने बताइएको छ ।

माओवादीको शनिबार बसेको स्थायी समिति बैठकले आज केन्द्रीय समिति बैठक बोलाउने निर्णय गरेको थियो । स्थायी समिति बैठकले सरकारमा रहेका ७ मन्त्रीलाई फिर्ता बोलाउने र एमालेमा गएका २३ नेतालाई स्पष्टीकरण सोध्ने निर्णय गरेको थियो । पोखरेलले व्यक्तिगत रूपमा नेताहरूलाई सोधिएको स्पष्टिकरणको पत्र पठाइसकिएको र सरकारी कार्यालय शनिबार भएकाले बन्द रहेको हुँदा आज पठाइने जानकारी दिए । 

माओवादीबाट अहिले गृहमन्त्री रामबहादुर थापा, उद्योग वाणिज्यमन्त्री लेखराज भट्ट, ऊर्जामन्त्री टोपबहादुर रायमाझी, खानेपानीमन्त्री मणि थापा, सिँचाइमन्त्री प्रभु साह, खेलकुदमन्त्री दावा लामा र श्रम मन्त्री गौरीशंकर चौधरी छन् । 

एमालेका अध्यक्ष केपी शर्मा ओलीले थापासहित २३ नेतालाई शुक्रबार केन्द्रीय सदस्य मनोनित गरेका थिए । एमाले केन्द्रीय सदस्यमा मनोनित भएका ती नेताहरूलाई दल त्याग गरेका हुन् वा होइनन् स्पष्ट पार्न स्पष्टिकरण पत्रमा भनिएको केन्द्रीय कार्यालयले जानकारी दिएको छ । उनीहरूले चित्तबुझ्दो जवाफ नदिएमा आजबाट सुरु हुने केन्द्रीय समिति बैठकबाट कारबाही गर्ने तयारी माओवादीको छ ।

 माओवादीले कारबाही गर्‍यो भने उनीहरुको सांसद पद पनि स्वतः जाने कानुनी व्यवस्था छ । एमाले अध्यक्ष ओलीले माओवादीका नेताहरू गृहमन्त्रीसमेत रहेका थापा बागमती प्रदेश र भट्टलाई सुदूरपश्चिम प्रदेश इन्चार्जको जिम्मेवारी दिइसकेका छन् ।